P5 財技戲法【股價圖：美團點評（03690）】
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
題目：新型冠狀病毒 有人歡喜有人愁
新年前在武漢爆發的新型冠狀病毒「武漢肺炎」在世界各地擴散，中國政府要封城應對，可見疫情比可以想像中的更加嚴峻，大大打擊國內及香港經濟，股票市場已經在農曆新年過後開市立即反映大跌。有危必有機，先唔講受影響嘅公司，有唔少上市公司股票異動炒上，分別有醫療、生物製藥類股份領先跑出，股票市場最可愛地方就係咁，明明報告指出暫時無任何藥物可以完全醫好「武漢肺炎」，但總之近似受惠嘅都去喪炒，如過去一周大升的中國醫療集團（08225）。
無論國內或香港，一般普羅大眾都只會願意留在家中，大家減少外出消費以避免受病毒感染，食肆明顯少了一半生意，加上來貨貴了，市面普遍菜價及肉價都上升不少，令唔少餐廳陷入兩難局面，客人已經少了仲要捱貴成本，加價只會更少人幫襯。再者，年尾勢頭唔錯嘅電影娛樂板塊又一同遭殃，多套電影在春節前宣布撤檔，既然都無人出街睇戲，仲硬要上映只會浪費公司存貨，但資金回籠會變得遙遙無期，話說2003年「沙士」足足搞了差不多半年，今次武漢肺炎擴散範圍比「沙士」有過之而無不及，相信起碼都要八至九個月先完全解決問題，就好似筆者本身收到風一隻本地電影娛樂股票過年後會開始大炒，但依家應該被迫擱置，呢個板塊可以擺低唔洗考慮。第二個重災區一定係旅遊及酒店相關板塊，多間公司已經開始戴定頭盔出公告聲明有關新型冠狀病毒對最新業務發展影響，在農曆新年前後暫停國內及境外旅行團，酒店又唔賣只賣國際機票，嚴格上嚟講即係食得屎。
有人歡喜有人愁，大部分人留喺屋企唔出街都唔代表唔會消費，好多經營網上生意的公司或會受惠，例如美團點評（03690）時間一定多唔少生意；手遊股、網上教育類股份都可以留意下。最後筆者希望呢單嘢及早解決，因為香港各行各業因為去年社會運動已經受到重創，再加上呢單「武漢肺炎」，就等於本身已經拆緊石膏，又被人再打斷雙腳咁，想好番都難。
【權益披露：本人沒持有以上股份】
Facebook 專頁：財技戲法
