P5 財技戲法【股價圖：大洋環球控股（08476）】
【走贊助商瑞邦證券】
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
題目：口罩供應少 概念熱炒
雖然依家口罩價錢下跌唔少，但想喺香港以正常價錢去買到口罩幾乎係不可能的任務，聞說全個地球的口罩每日生產量為4,000多萬個，假設以一個月計只能供應12.5億個，一個月的供應量都唔夠分畀每個中國同胞一人一個口罩，就係供應短缺搞到依家行過路過藥房，求其一盒平時賣幾十元的口罩漲價到每盒索價數百元，一盒N95口罩都要一千多港元。
香港電視（01137）都先拔頭籌，又話買口罩機價低者得，講到尾都係營商手法，擺出個為香港大眾服務嘅殷實商人樣，就自然好多人買口罩順便都會幫襯買下其他嘢，請幾個打手做做文宣美化一番，股價炒高幾多倍都無人會話佢啦。最後故事發展當然係成功配股抽水，今次仲要係先舊後新以5.15元配股，當然個價係有排都上唔番去，落咗疊嘅傻豬肯定腸子都悔青了。
總而言之，股票世界就係咁，依家只係炒一樣嘢：肺炎概念。一日天氣未轉炎熱，疫情都仲未會搞得掂，睇怕呢個概念會延續一段長時間。
趕上轉板尾班車的黑馬
全世界都關心緊每日確診人數數字有無上升，邊度可以搶購到便宜口罩，同一時間個大市又唔係好跌得落，正正係咁就要留意下有咩公司靜靜去革命。話說筆者要介紹嘅呢間大洋環球控股（08476）於2017年10月19日上市，集團是一間業務穩健的香港急凍海鮮進口商及批發商，在急凍海鮮進口及批發行業擁有逾16年經驗，向逾300個客戶供應各式各樣的急凍海鮮產品超過100個品種，該等客戶主要為急凍海鮮轉售商及急凍海鮮餐飲服務供應商。
以筆者所知，無論急凍海鮮或者肉類毛利都係超高，而且淨搞批發唔洗用門市做生意節省唔少支出。加上話明係海鮮就一定有海鮮價，打個折都容易啲，唔排除業績當中有些少水分。不過咁，過到海就係神仙，剛剛公司在去年12月入紙申請轉主板上市，就喺申請轉板前兩個月大股東配售現有股份3%，以當時股價到依家咁耐都相若無幾計，加上買賣交投極少，相信呢之配售一定有古怪，同埋大股票理應仲係手握不止牌面72%股權。以依家公司申請轉板已兩個月計，而多數申請四個月就有結果，不妨諗諗佢「起個孖，做爸爸」。
【權益披露：本人沒持有以上股份】
Facebook專頁：財技戲法
