作者：棉少爺宿主Zoe
觀音開庫有潛規則？
本欄由今期開始，只會在invest360.net見刊，亦意味著本小姐將會有更充裕的時間做寫稿準備。始終《炒股幫》作為紙媒需要趕及deadline，而invest360.net一類網媒在處理稿件收發時自然較具彈性，對於這個安排都算ok啦。
執筆之時剛與朋友成功自觀音廟借庫凱旋歸來，而且借得的金額都幾可觀下。不過朋友就話，過去十年他經常同佢班手足參拜這間觀音廟，相信全廟上下人等都收過他的大紅包。總之每次「光顧」都有得醒啦，難怪他連年借庫都如有神助，在幾經指示之下總會抽得大面額的「貸款」。本小姐對此很不以為然，這豈不自己騙自己，自我感覺良好？朋友聳聳肩、只當耳邊風，仲話神明的世界某程度是由人界主宰的，總之識做人，神也會配合，這就是所謂天人合一。
聽罷若有所得，原來觀音借庫都有後門可走，難怪剛才一路走來，都好似未排過隊就順利入廟出廟。朋友繼續講，香港股票市場就好似觀音廟，「玩法」差唔多，但係觀音就唔止得一個，而且有好多香爐，基本上真神假鬼難分。
不過有借有還始終是硬道理，朋友都強調放貸金額可以出術，但借完一定要還。就好似股票可以炒孖展，但篤手指賭白頭片就一定唔得。
