作者：EC執，全職註冊中醫師，新城財經台《重新睇健康》環節「正中醫理」主講。無論疾病或投資上的病痛，都用望聞問切去辨症，再用固本培元的方法去施治，希望投資路上的心得，可讓你藥到病除。
點解咁大劑
曾經有個病人睇完病，取藥時問我：「醫師，點解喺出面睇中醫，人哋開咁大劑？而你開的藥就得咁細劑？」唔知點解，我即時想講粗口，心諗：大佬，藥都要貪多？去食鮑魚就話想貪大隻，但藥唔係愈多愈好的。我反問：「知唔知咩野叫對症下藥？咩野叫貴精不貴多？只有斷唔到症的醫生，先會大包圍，咩野可用的藥材都大大堆咁加埋一齊，實有樣中。但係就唔知個病係心肝脾肺腎邊到出咗咩問題，又唔知個病人寒熱虛實係咩野情況。」
夠大劑，份量重，病人往往好受落，一見到醫師落重藥，見到大劑就以為好有料。真正有料到的中醫，是斷症準確，找出病因，開少少藥就可以一擊即中。
例如中藥最出名的方劑中，補氣血的是八珍湯，材料有：當歸、川芎、熟地、白芍、黨參、雲苓、白朮、甘草，共八味中藥；滋陰補腎的代表方則有六味地黃丸，由熟地、淮山、山臾肉、丹皮、澤瀉、雲苓，共六味中藥組成；而中醫名著《傷寒論》中，有條名方叫桂枝湯，材料則由桂枝，白芍，生薑，大棗，甘草共五味中醫組成。以上幾個名方都只包含很少的中藥，唔通功效就不及大包圍的中藥？如果係咁的話，又點解可以留存至今成為有名的藥方？
除此，病人仲會誤解中藥分量愈大劑愈好，其實不然，因為中藥中好多的藥都有相向作用，太多太少有不同的效用。如白朮，少量能健脾止瀉，一般用量三錢，但如用到大劑量，即一両或以上，就變成通便的作用。如果一個病人肚瀉，用大劑量的白朮後果就不堪設想；另一隻我哋常用的補氣中藥北蓍，也是有相向作用的。如氣血虛而血壓低的人，北蓍一般用量三至四錢，可提升血壓。但如氣血虛，但又有血壓高的人，大劑量北蓍，即一両以上，就可以有明顯降血壓作用。
說到這裡，大家應該心中有數，一個精通醫術的中醫，不會隨便大包圍，大大劑地開藥，而是用貴精不貴多的方法去處方。
如果將中醫的呢套貴精不貴多的斷症心法，運用在財技股方面，又是否行得通呢？我先作一個對比，如果有大劑量的散戶買入一隻財技股，買到股權分散晒，你認為大戶向上打升呢隻股的機會大？還是將呢隻股票向下炒的機會大？相反，只有細劑量的人數，例如只有頭十大證券行持有一隻財技股九成股票，出面無咩散戶有貨，即使依隻股病到死下死下時，你認為細劑量股權集中的幾個莊家會將隻股票起死回生，還是再趁佢病攞佢命呢？答案當然是冇咩散戶參與，細劑量股權集中的會炒起啦。
而作為荷包乾硬化的散戶，應該藥石亂投大包圍咁隻隻財技股都買啲？還是貴精不貴多，集中火力去買幾隻重心股？如果是有限金錢，我會選擇貴精不貴多的方法去醫荷包乾硬化，慢慢等待日積月累的調理先可賺第一桶金。當有了健康的身體，豐厚的本錢，他日隻隻大大劑咁落注也未遲。而近日炒起的財技股全是半新股，好多未炒起而又歸邊的大家不妨留意下。因半新股，一般有禁售期，即通常只有25%貨源流通，如這25%貨源又歸邊的話，一般莊家都會趁少流通時將股價打升。當然選擇玩這些半新股，要留意的是，此股上市後有無曾經打升多倍，如有的話，就算歸邊，莊家也可滲貨出來獲利。因每個價位放出也是贏錢，相反如上市後一直未大升或潛水的半新股，當莊家收夠貨就可隨時炒上。當然除咗睇是否歸邊外，還要看發行的股數、市值等。因如市值太大，莊家就要花好多的財力才能將股價推上。
總結：一個好的財技醫生，貴精不貴多。一個想被醫生醫好的病人，唔使羨慕人哋點解咁大劑。
