作者：Sammy畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
福建幫大佬嘅股票（一）
其實大部分人朝早起身都會想唱住王傑首歌：「可以Hea的話不會郁，屋企鬆一鬆至夠舒服，偏偏美市夜晚大跌，仲有高位出貨嘅QQ，沒有幸福！」周四（3月22日）夜期大插八嚿，周五（3月23日）朝早想Hea都無得Hea，拿拿臨九點鐘準時埋位等開市。
幾時都係咁講，如果喺大跌市見到某啲股票都係唔跟跌，又或者係能夠反地心吸力逆市上升，都係有實力嘅股票。好似上兩期同埋做Live時都有同大家推介嗰隻中星集團控股（00055）都係成交唔多，而且收市能夠無升跌；實力之選三盛控股（02183）更加係先跌後倒升，因為人地啱啱攞完個「中國房地產百強」第64位同埋個「經營績效十強」，林生（集團主席林榮濱）點會俾佢個價咁肉酸呢！有人喺Facebook問我幾錢沽好呢，其實，點都要等中央結算及交收系統（CCASS）細劉（劉鑾雄）啲貨（新鴻基、結好）開始明顯減持先考慮沽出吧。
其實大跌市，有危就一定有機，無啦啦都有風收。話說就喺周五嗰晚，好友H君喺個WhatsApp群組度問，有邊隻殼股喺主板上市做物流又唔係先達國際物流（06123），佢收到風呢隻股票得得哋。唔使好耐，阿活即時彈咗隻股票出嚟回應佢呢個問題，不過H君再補充呢隻股票係差唔多四億市值，有福建幫大佬坐埋同一條船。講到呢度，呢隻股票喺筆者腦海入面呼之欲出了，其實只要喺「披露易」查一查呢位福建幫大佬嘅持股就會知係邊隻。
首先講講呢位大佬往績，好多隻佢有份沾手嘅股票都有十倍以上升幅，真係威力驚人。呢隻股票未大炒過加上佢正手持股都有超過六成，睇番佢中期業績賺又賺唔多、手頭無咩Cash、負債又唔多，最近上年年尾仲要配多手貨俾呢位福建幫大佬㖭，其實淨係個市值都比殼價Discount咗一大截，如果入去CCASS度睇個乾度信心又會大增唔少。至於係邊個號碼，等筆者賣下關子唔講住先。大家放心，筆者唔會好似「巨型動物」個Facebook Fans Page咁平時扮晒專家，永遠講一大堆模稜兩可嘅嘢，答讀者又答到一嚿嚿咁，下期或者筆者做Live時就會講㗎喇。
今期心水都推介大家買先達國際物流，呢間公司同三盛控股好相似，就快改名圓通速遞（國際）控股有限公司。改完名就緊係注資、打入「深港通」50億市值門檻，條數咁計現價5.61元起碼都要打上12.06元以上係基本。
【權益披露：本人持有三盛控股股份】
