作者：沈寧（Eric），飲食狂人，食盡天下奇珍異獸。
水鴨朱椰子雞火鍋小廚
今期要介紹嘅係位於大角咀棕樹街嘅水鴨朱椰子雞火鍋小廚。餐廳以打邊爐為主，湯底款式選擇都幾多，除咗有正宗海南椰子雞，仲有醉雞、雞煲、水魚鍋、酸菜桂花魚鍋同一般蕃茄薯仔、鴛鴦鍋等，定價大約介乎58元至298元。
而招牌當然是椰子雞煲，店員會先上新鮮椰汁鍋，再上半隻新鮮文昌雞，店員教我哋先等椰子水滾起，然後至加入雞件，大火滾起後熄火，再計時三分鐘，就當雞肉剛好熟晒，又唔會過老，雖然未至於話嫩滑咁誇張，但食落都唔鞋口亦都唔會韌。雞肉肉質有彈性，雞皮晶瑩，入口爽脆相信係文昌雞之特色，既不油也不膩，椰子水湯底清潤，入面仲有椰子肉、竹笙等材料，對於我哋平日冇咩湯水嘅人而言，已經覺得好正，所以都飲咗兩三碗，飲完亦唔會口渴。飲晒湯，食埋雞，店員都會主動幫我地加湯，非常貼心。
另一推介就係炸豬手！豬皮炸得非常脆，再配上沙嗲黑椒汁非常開胃！甜品方面，可以推介椰子凍，算太甜，除了椰子肉外，仲加埋啫喱，幾特別，不算太甜，份量足夠兩人食，可以一試。
