作者：Sammy畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
福建幫大佬嘅股票（二）
上期推介大家買嘅先達國際物流（06123），走勢都非常靚仔，公司在上周三發公告將於四月十日早上九時由先達國際物流正式改名圓通速遞國際。正正係圓通在國際上唯一上市平台，相信改名後會同三盛控股（02183）一樣大展拳腳，有一連串注資或者資源整合活動，第一站大家先望番上次公司宣布建議改名後股價嘅高位7.8元都不為過。
基本上今次大市呢個跌浪，首當其衝都係大價股或者指數股領跌，細價股反而有一定抗跌能力，所以幾時都話跌市都係尋寶嘅機會。筆者上個星期寫完《福建幫大佬嘅股票（一）》，就有人抄，話係自己搵到，邊有咁巧合呀？抄唔係問題，呢隻係靚到絕嘅全購股，佢Facebook叫啲Follower當係短炒咁食格仔先嬲嘛，升幾格就車哂俾啲追隨者完全無道德可言，理由仲要話因為無力。大佬呀，一買完就話無力，佢好似第一日炒全購股咁，仲要開班教人，你話死唔死？相信呢類「專家」喺呢行都係多如天上繁星，密集如小弟腳毛。
講番隻福建幫大佬嘅股票，雖然我都在Facebook專頁有講過，而家都喺度正式開名，就係華隆金控（01682），改名前身係高銳中國物聯、福源集團控股。公司早在2017年7月19日被要約人支華先生完成收購62.01%，要約價為0.931元。如果有睇哂成份公告就會搵到呢一單全購嘅其中一大亮點，「興龍」認購要約人的A、B系列票據為要約人提供融資，其中金利豐亦提供了1億元左右融資需要要約人用股份抵押，所以大家見到金利豐在CCASS持最多貨。除咗有金利豐幫手之外，興龍都係重點中嘅重點，興龍分別由吳志龍先生最終實益擁有50%及由金威集團控股有限公司最終實益擁有50%。金威集團控股有限公司由Hillbrow Securities Limited擁有99.9%及由吳良好先生（吳志龍先生之父親）擁有0.1%。Hillbrow Securities Limited由吳良好先生全資擁有。興龍及其實益擁有人各自被認為與要約人一致行動。如果大家花啲時間上網查下就會知道支華同埋吳良好老友鬼鬼，吳生之前嘅榮得豐控股、金威資源（現已改名天成國際）（00109）、其他有份沾手股票都有十倍八倍升幅。公司在全購後好快就做了兩單一般授權配售新股，分別以貼近全購價0.93元配售6.19%及以0.7元配售18.83%新股予吳良好先生，做完兩單配售後一致行動人士股權已相當集中，同埋公司快速改名，筆者相信呢位福建幫大佬會有大搞作，以現在0.77元（4月6日收市價）5.1億元市值係非常超值抵買。
今期就講到呢度，預告下期推介金力集團（03919）。
Facebook 專頁：財技戲法
【權益披露：本人持有三盛控股、先達國際物流股份】
