作者: 棉少爺 / 宿主 Zoe
見蕉拆招
棉少爺宿主Zoe，乃典型中環白領女，為了可周遊列國同拯救各地貓貓，一於拚盡股海淘金。
最近，我隻「貓星人」棉少又睇番財經節目，而且對有數字嘅波波重燃興趣，仲追得幾落力吓，唔通係一個大市反彈信號？
執筆之時（12月5日周二零時）美股已大升逾200點，惟港股夜期仍然跌幾十點，似乎班淡友仲未醒，下場必然係被夾死，而且係不久將來的事。屆時港交所（00388）企穩245元以上收爐，騰訊（00700）亦會重上410元。
何以見得？恒指由11月22日見過的30,199點，一路跌至本周一（12月4日）低位28,803點，期間累跌1,396點或4.62%，有關幅度已夠晒皮，因為這已是恒指過去一年，第二最大跌幅。至於最大跌幅呢，就出現在2016年12月8日，當日恒指高位為23,076點，急挫至同月23日21,494點，期間累跌1,582點或6.85%。之後恒指穩步上揚，期間下調幅度亦不過是3%左右。假如恒指是次亦要跌6.85%至夠皮，從上述提過的高位30,199點計，下跌6.85%即2,055點，即恒指要見28,144點？No La ! 目前已跌夠，最多睇埋條50天線（約28,326點），但機會很微。
不過，大市要重上30,000點就真係有啲難度，希望本文見刊之時恒指可企穩29,300點。本小姐堅信，港股現階段只是調整，畢竟30,000點心理關口太過沉重，需要多一兩個月時間才可以正式收復。唯一擔心的是A股，目前又傳有基金走佬，阿爺為咗維穩已下令限制內地基金沽A股，基金佬水深火熱唯有焗沽港股，情況就如2015年「港股大時代」之後的跌市一樣……
