匯聯金融交代復牌工作進展公告內有淚印
關注組收到停牌匯聯金融(08030.HK)最新公告同埋新聞稿，向公眾及股東交代復牌工作最新進展。時間相隔一個鐘，又收到匯聯金融小股東的求助公開信。
匯聯金融於上年三月二十九日停牌，六月及十一月分別收到港交所復牌指引及補充指引，公司由舊年十二月開始開足TURBO做復牌工作， 由委任新董事至提交到復牌建議，短短四個月可謂馬不停蹄。
不過，到三月底，創業板的停牌十二個月就會展開除牌的死線已經屆滿，雖然港交所有酌情權，不過港交所上市科又點會咁易放生，至於啲小股東死活，亦未必係港交所班高人一等的審批人員所考慮。
不過，係香港人都知，呢四個月大家都經歷咗啲咩，所謂有工番不得、入張支票都要行多幾門分行，更遑論香港深圳難以通關、骨肉分離、連奔喪都去唔到。關注組好快望一望匯聯金融，間公司喺香港上市，但主要運作喺深圳，兩邊都係新冠疫情水深火熱之地，就咁睇牌面，港交所都應該酌情俾多啲時間公司去跟進復牌條件啦，不過而家香港政府同各部門做嘢，我哋一般市民有限智慧有時都好難理解。
見到公司公告，睇得明的朋友可能都感受到種種無奈辛酸，公告已經接近跪求港交所大發慈悲的程度，至於小股東封信更加有血有淚。
關注組稍後會再詳細理解背景，稍後再作出正式回應。
