作者：EC執。簡介：全職注冊中醫師。新城財經台（重新睇健康）環節（正中醫理）主講。無論疾病或投資上的病痛，都用望聞問切去辨症，再用固本培元的方法去施治，希望投資路上的心得，可讓你藥到病除。
以輪擊石（下）
續上周……
（六）換股價
換股價也很重要，因買輪是炒槓桿，例如輪由價外，當正股升到價內時，發揮的槓桿往往最大，所以選輪時最好買一些輕微價外而不要太價外的輪。
（七）輪價
輪無分貴賤，貴價唔等於好，平價唔等於差。
（八）溢價
在我炒輪的心得中，溢價是最重要的一點。你同人對賭，如果人哋開出的條件是好唔合理，但你都接受，就是自己搵黎輸。賭錢，最好是在相對公平的條件下去賭，但由於人哋是莊，有權開出溢價問你願唔願意接受，你認為合理的就去賭，唔合理就諗都費事諗。
有人問溢價點先叫合理，我會話越少溢價越合理，所以搵股票方面就要先搵隻有波幅的去賭。例如中國移動（00941）咁，成年都現價浮沉，佢的輪溢價最好不過3%；騰訊（00700）每日都十幾二十蚊上落，但由於四百幾蚊一股，所以佢每日波幅一般是3%，騰訊（00700）的輪可接受最好不過6%溢價。
其實炒輪先要搵到有波幅的股去炒，每隻股票都有佢的每年歷史波幅，如正股每年的上下歷史波幅越大，佢的輪相對可接受的溢價大些，如正股的歷史波幅細，佢的輪可接受的溢價就要更細。選輪時，大家可以以不同的輪商中選出幾隻溢價細的輪去參考。
（九）引伸波
引伸波幅指的是當預期正股的上下波幅擴大時，輪價也會相對擴大波幅。當預期正股橫行時，輪的波幅也會收窄。即炒預期，預期大升，輪價先上，所以波幅擴大，預期唔升，輪價先跌，波幅收窄。所以牛皮市，往往股唔升，輪收窄引伸波幅而跌。好聽就叫收引伸波幅，唔好聽就叫縮溢價。因如果無溢價，就無引伸波幅可收。如同一條件但兩個發行商。一個發行的輪有2%溢價，一個0%溢價，往往有2%的發行商會盡沽自己的輪，同時去買第二個發行商無溢價的輪，賺2%。
（十）對沖值
由於每隻輪都有溢價，所以正股每升一蚊，輪是大多跟不足一蚊，可能得八毫或五毫。所以留意對沖值就可買入前參考計數，你到底想對沖幾多正股，即如目標正股升十蚊，你的輪對沖值得八蚊，到唔到你預期的回報。
（十一）街貨量
街貨量等於多唔多人參予。如多人參予，街貨量多。少人參予街貨量少。多人參予有機人為因素應升時，但多街貨沽而不升。
（十二）換股比率
買賣前要睇清換股比率，因有些輪是一換一正股，有些是十換一正股，有些是一百換一正股，如恒指輪，有些是5,000換一，有些是6,000換一，有些是7,000換一，有些是10,000換一。即恒指每升跌5點、6點、7點或10點就會反應一個價位。所以買輪不要貪平，要睇清換股比率才計到值唔值博而不是平的輪就等於平。
（十三）槓桿
買輪就是想用最少的錢去賺最多的錢，所以槓桿好重要，如無槓桿不如買正股。槓桿分為兩種，一種是正股而輪價表面值去睇的槓桿。現價100元，如一隻輪一換一正股，換股價100。但輪價5蚊。當正股升1蚊，輪價也應升1蚊。即槓桿有20倍。但由於往往有溢價，所以正股升一蚊，輪往往升得5毫，即實際槓桿得10倍。
總結：輪是種以小博大的賭博工貝，如正股都唔識炒，就更不要炒輪。只會以輪擊石，輸清光都未天光。如對正股已摸清方向但金錢有限希望靠槓桿博一轉。我建議買輪最要睇幾樣就得，其他可以唔理。第一，到期日。第二，溢價。因輪貴唔貴睇實溢價就得，越低溢價越平。第三，槓桿。買輪就是博佢槓桿以少博大。所以到期日長，溢價低，槓桿高的輪就是好輪。其他乜街貨，引伸波幅我當佢透明的。
【權益披露：沒持有認購證和認沽證】
