作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
國投有潛質炒一轉
上兩周筆者已出了兩篇文介紹利福中國（02136），加上早在股價於2.61元時在Facebook專頁推介，絕對有足夠時間給大家去跟買，適逢今天5月7日為利福中國股東周年大會（AGM），會後細劉被問到關於公司回購股份問題，劉生表示：「最近不斷回購股份原因是股價未能反映公司本身價值，若股價仍未能反映資產價值，將會繼續回購股份，亦會視乎有多少現金可用作回購。」他指出，在當初利福中國由利福國際（01212）分拆時帳面值已嚴重低估；他又指，回購將令股東資產增加。呢個係咩？明顯係畀晒貼士話畀大家佢會繼續打上去啦，大家留意下呢句「若股價仍未能反映資產價值，將會繼續回購股份」，翻查對上一份業績公告大家會發現，佢NAV起碼有6.8元以上，現價計潛在升幅起碼有八成以上！
另外順帶一提，港交所（00388）又有新嘢出，上星期剛發表打擊「向下炒」諮詢總結，將會修定《上市規則》限制具高度攤薄效應嘅集資活動，禁止所有會令累計價值攤薄效應達25%或以上嘅供股活動，將於今年7月3日生效。首先筆者認為7月3日先有可能會有公司想趕尾班車主進行供股集演，同埋大家唔好以為咁樣公司就無辦法做供股，因為假設特殊情況，公司財務上有迫切需要資金，仍然可以獲得聯交所批准，所以考慮公司會唔會供股時要睇多一樣嘢。
好股依然係上兩期介紹嗰幾隻利福中國、華誼騰訊娛樂（00419），如果大家錯過咗又或者點都要搵啲嘢買下，今期筆者會介紹大家買國投集團控股（01386），未賣殼前佢係筆者愛股之一，經營Walkershop品牌做零售鞋具名生意，創辦人魂歸天國之後由老婆接手，一直經營不善年年虧錢，所以一直都係潛在賣殼股。佢賣殼兩次，但第一次唔成事，坊間有傳話係創辦人個二房唔肯賣或者傾唔掂數；第二次賣得成，G.O.價以每股1.233賣俾上海旭日養老服務公司朱曉軍，G.O.時收多咗貨要恢復番公眾持股量，仲以同樣價錢配股9.09%畀佢哥哥持有嘅球隊AC帕維亞，聽聞呢個球會俱樂部同年10月6號破埋產添，都咪話唔奇。
不過炒股還炒股，呢隻股票全購後曾一度打上2元以上，而家回落至1.17元已經低過G.O.價1.233，股權方面絕對係非常集中，兩個字「值博」。
【權益披露：本人持有華誼騰訊娛樂及利福中國股份】
