作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
雄心壯志捱唔住都要賣
經過兩日回調利福中國（02136）已在3.5元左右跌定回升，有讀者當時在3.6元時問我利福中國未買應該咩位買好，筆者就答咩位都買得，而自己手持三四十萬股亦無打算沽，正如細劉做回購一樣，咩位都係超值。就喺上周四、五，筆者就開始在5.1元至5.3元買回部分之前沽出的圓通速遞國際（06123），都買唔夠貨就踢咗上去5.55元收市，係時候又要望番上7蚊喇，始終下個月初6月8日股東周年大會，個股價點都應該做番靚仔少少叫有交代丫，而且老闆都會有「飛士」，同埋可以睇下股東周年大會度新老闆有無啲咩重要方向公布啦。
除咗隻圓通速遞國際，筆者個倉仲加入咗一隻新寵兒CEC國際控股（00759），睇個冧巴就知係759阿信屋啦，筆者仲記得當年肥仔老闆林偉駿創立高雅線圈起家，1999年上市，11年後轉戰零食市場，呢8年來雄心壯志不斷擴充分店。筆者雖然好少幫襯759阿信屋，但係印象中佢早期定價係賣得超平，由最早期只賣零食到進化成糧油、凍肉食品、女性美妝用品一應俱全。其股價節節上升，成條路本來都行得好順，高峰時期股價曾一度創下歷史高位差唔多接近有5元。始終花無百日紅，自從2015年7月之後公司就開始無派過息，睇番佢呢幾年都係蝕緊錢，到上年不斷出售物業套現減債，年年蝕幾千萬都咪話唔頭痕！所以筆者認為佢有輕微賣殼可能性。
記得上周「阿活」來料話有朋友喺阿信屋其中一個供應商度工作，本身同阿信屋內部人士好熟話而家阿信屋開始CUT單，傳緊好快會賣殼。老老實實，聽到第一個反應就係：佢供應商絕對唔會係得一個咁少，一個半個唔同佢攞貨又唔代表啲咩嘅，但佢由4個幾碌落嚟5毫幾6毫又確實非常吸引，睇番佢市值都係4億幾元，肥仔大股東揸7成股權，非常抵搏！唯一難搞係佢200幾間店吊住喺度要睇佢點搞，始終759都叫做有個品牌同埋成形嘅零售網絡，雖然係蝕錢但賣埋個業務都唔係唔可能。眼見近幾日股價有異動，加上又有消息配合，筆者都唔執輸買少少玩埋一份，希望可以順順利利搭番程順風車。
【權益披露：本人持有利福中國和圓通速遞國際及CEC國際控股股份】
Facebook 專頁：財技戲法
