作者：Ivan Leung – 喜歡音樂、教學培訓、投資、寫文章，熱愛探索新事物，保留著對世界的好奇心。
問題。天天都多
有時，人最大嘅問題，係唔夠自信同唔夠自律。
做投資，無自信嘅，分析完一大輪之後永遠都唔會肯買野；而無自律嘅，就永遠都唔會理出面係咪立立亂都會係咁買野賣野，亦唔會set止賺止蝕位，或者set左但點都唔會跟隨。做運動，無自信嘅無論大好機會wide open無人守嘅中距離你都係唔會肯投籃、抬上面有個半chance機會嘅hard shot黑柴你係點都唔會肯打、左手邊線無人推落底你都只會cup停後傳永無推大位射波；而更大獲嘅係，無自律嘅你次次玩完之後，宵夜都係去食打冷、雞煲，飲藍妹又睇骨妹，返到屋企你老婆問你做咩野運動，搞到成兩點幾先識死返嚟，下次都係唔放畀你去做運動嘞。你好唔開心，下次見到阿明阿基，問起你點解果日明明歐聯約左一齊睇，點解放飛機呀？你唔通話，上次因為返屋企遲左所以被老婆restricted左人身自由咩？無自信、無自律嘅後果，係好多時連自重都無埋，無左自我尊重，就連帶個結果都被影響埋。
無論你做得幾好幾差、幾盡心用力或者有幾hea都好，世界總會有人like你buy你，果種鍾意，亦會衍生出hater或者大量hatersssss嘅存在。大帝James可能係MJ年代之後近年最堅勁揪嘅nba球星、誠哥可能係本地最有國際視野同政治觸角嘅一代商家、C朗美斯係近年嚟最有競爭力同主宰比賽能力嘅足球員、Donald Trump係美國優先政策最忠實嘅執行者、黃子華係近十幾廿年將stand-up comedy通俗化地道化最成功嘅一位表演者，佢地一樣會有hatersss，甚至乎連群結黨嘅攻擊、鋪天蓋地嘅謾罵、與事實未必相符而又情緒化嘅批判。
到果陣時，你可能會質疑、懷疑自己嘅能力，信心開始動搖。當然，你亦可以繼續死頂，直到情況改善為止。有一次，幾年前，我做左功課，分析左一個行業，睇好呢行其中一間幾有份量嘅公司，當時佢$4.2我買左一大注，之後，行業負面新聞不停嚟，不過，我認為公司基本面唔單止無變，仲應該會愈來愈好，發展愈來愈穩定，於是趁佢$3.2果陣，入多一注，將平均成本拉到$3.66，而其間呢個時期，仲收左兩次加埋成２毫子嘅股息。之後，一年之後,佢開始開車嘞，一路升，爆到去九蚊左右就回氣，我驚青嘞，於是$8.8同$8.92全部賣晒。可惜，回完之後，佢繼續去，爆到去差唔多$19先識停，宜加都係十零蚊上落。未睇最終結果果陣，我為自己睇中投資獲利而充滿信心；但當睇到最尾嘅結果，我卻為自己掌握唔到最好timing少左成十蚊嘅出貨機會而失去信心。另一次，近排嘅，2017年，新經濟股當炒，其中有條蛇，IPO果陣時有些少微甜頭，所以，佢回到差唔多果陣，我就入左貨嘞……結果？大家知，心照，心知不妙，心如刀割。陳奕迅有首歌，cry in the party，再接下來就要收拾了。我呢？就crying in the market，總有段情，落入這種困局。
無錯，人最大嘅問題，就係唔夠自信同唔夠自律。但係，當你太有自信果陣時，就會變左自負；而沉迷自信嘅結果，就係會唔記得左自律——對自我的紀律。失敗嘅禍根，就果刻開始種下嘞。咁點樣平衡呢？就係，間唔中要中吓招，訓練吓反應，提醒吓自己，無論幾成功都好，自己唔係神唔係king，歐聯三年霸都好但係西甲始終差啲，東岸點勁都好但係西岸有隊野叫勇士頂住晒，國內點強勢都好出面有個霸權叫美國壓住晒，2017年超級順利但過完2018年Q1你先發覺原來輸係唔可怕，贏完先輸都唔可怕，贏完輸突然後信心盡失企唔返身先大獲呀！
