作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
中興大跌都可以蝴蝶效應
年輕人，究竟有咩驅使上周啲二三線股升得好地地無故大跌？係個市唔就黑仔定係散緊水呢？係因為中興啊！好多股友都大惑不解，就連筆者愛股華誼騰訊娛樂（00419）諗住佢0.455元都差唔多跌定，都要兩嘢打穿250天線劃個極品樣衰圖出來。經過幾位朋友討論完之後，都係覺得同中興（00763）復牌唔多唔少都有啲關係。可能你會覺得中興大跌點會關啲細價股、財技股事，但世事往往就係咁奇怪，可能住港島某位黃師奶今日買唔到條魚都會令到11歲住九龍嘅陳仔後日買唔到隻game，話說黃師奶買唔到條靚魚，搞到佢老公本來諗住辛苦完返屋企有餐魚食而無得食耿耿於懷，於是第二日約埋的士陳、電線強同埋水泥明返大陸食海鮮，飲飽食醉嗰條佬索性住一晚先返香港，點知朝早趕返工無返屋企無放低零用錢俾個仔，陳仔就差少少錢先買到隻game。股票世界都係一環扣一環，中興呢類比較「大隻」嘅股份，唔少證券行都會俾50%至60%按倉比率，咁中興復牌大跌，首當其衝就一定係先斬股仔，因為股仔按倉比率比較少，有啲股仔甚至係無按倉值。
已知嘅事實就係好多市場莊家炒股票多數都係拎手貨去證券行，睇下按到幾多或者批到條credit line有大，然後炒番同系股票，所以當時咪出現「粉塵事件」。不過而家好多證券行都非常小心，唔係話隻股票喺呢間證券行有20%按倉比率，個大股東持75%約50億元市值股票來就可以借10億元走，好多時都要睇下你間公司資產、業務等等，有還款能力先會借畀你，同埋大拿拿去借兩三億元都唔係易事，人哋更加唔想接手要你隻殼，好多細行接咗呢啲生意返來都係要拆散畀啲行家做，事成後當然要收番多少介紹費啦。
以前因為無乜監管，好多細行都係10萬元cash畀你買100萬元貨（依家都有，但相對少），跌10%已經全部GG，雖然依家好多證券行孖展都收緊咗，相對風險比以前細好多，但係始終講到尾係雙面刃，孖展額好可能加速你贏錢同時加快你輸錢速度。好似我有一個師奶級朋友，成日都諗住搵間低過5%孖展息嘅證券行，然後買高息嘅匯豐控股（00005）去賺息差，呢個絕對係傻瓜諗法，第一，孖展絕對係只能短炒唔能夠長坐，第二做呢樣嘢係要肯定你買入後股價唔會有波動或者只會向上升。
今期都係無咩心水，繼續望實隻走勢唔錯嘅CEC國際控股（00759）同埋今次高位飲恨無乜點食糊嘅華誼騰訊娛樂（00419）。
