作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
你要靜候再靜候 就算出陰燭都要守
正所謂錯就要認，筆者上一期都有地方寫錯了，所以就此向各位讀者道個歉、賠個罪！話說上一期筆者認為利福中國（02136）嘅「細劉」在6月26至28日所增持的股份為FMR LLC的減持貨量，但最近FMR LLC減低至4.97%後又一次更新變回5.08%，原因係當日註銷股份調整所致，而因為咁FMR LLC再減持一股都需要作出披露，所以細劉增持嘅貨好可能係自己橫手沽番畀自己。直至執筆之時，劉鑾鴻先生已增持至73.85%離大股東上限只有1.15%差距，準確啲去計就係佢往後只能增持多17,037,000股，當佢揸到呢個貨量嘅時候（其實依家都差唔多），就離反映每股實質價值不遠了，剩下來就係「你要靜候再靜候，就算出陰燭都要守」。
個大市氣氛咁差就講下啲八卦嘢啦，依家股票市場除咗「微信女」散貨之外，仲進化到涉足其他通訊交友平台，如Whatsapp女、Facebook女等等。除咗呢種散貨途徑之外，另一種就係創造股神，呢個方法好直接，就係「有心人」做邊隻股票就直接畀料，然後小股神喺各大媒體又好、live直播又好輕輕推介再吹噓自己有幾勁，等有心人踢高幾倍之後再大肆張揚貼圖有晒證明自己入咗幾多貨，輕鬆贏十倍八倍諸如此類，劇本再落就係sell課程啦嘛！咩財技班呀、盤路班呀、新股分析班呀，湊齊十個八條水魚學生再搵多幾個自己人去埋上堂，跟手就可以影到啲「全場爆滿加徇眾要求，考慮加開多幾班」嘅相。係咪班班都咁多人上呢？梗係唔係啦，佢哋上過堂嘅水魚又可以無限輪迴再上，帶多個Friend仔去又半價加無限輪迴之類。最絕一招先係戲肉，上完堂就將所有人拉入去WhatsApp Group入面，個Group名就當然唔係「乜乜財技課程第2班第3班啦」，一嚟個名就係「乜乜財技課程第43班」，外面啲有朋友私下告知「水上生物」就係呢套方法搵錢加幫手散貨，當然無可否認佢之前係贏過大錢，如果唔係都唔會有咁多錢去幫黎明先生做「大頭」收高息坐住咁大手「含堡」股票啦。啲魚唔知啲貨唔係佢嘅，同埋佢要嘔返出來，仲羨慕佢搵咁多錢𠻹。傻豬嚟嘅，成功幫到手散貨，人哋醒隻錶畀佢又老實話個真相畀你哋知咩？佢就梗係即刻倫敦金仔上身急不及待貼出來話獎勵自己啦！
話時話唔知有無人留意到有一排「肥蜂」、「水上生物」、「粥粉麵飯專家」、「肥美主席兼執行董事」、「少女真人版邵X音兼粥粉麵飯專家以前條女」（年紀上其實都中女近熟）啲料有幾分相似，推仲親啲股都差唔多，聽聞部分仲跟「比卡丘」搵食𠻹。
【權益披露：本人持有利福中國股份】
