作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
從CCASS券商持股洞悉倍數股（一）
先前筆者推介利福中國（02136），有見識的讀者朋友與筆者在Facebook交流都有留意最近「細劉」密密增持公司股份，現階段已持股高達73.92%，還差1.08%就觸及75%上限。依筆者愚見再進一步看似不太可能了，因為下月中應該會公布中期業績，而業績公布前一個月內「細劉」是不能增持公司股份，公司亦不能再回購股份，所以「細劉」先急住連番增持。另外，FMR LLC持股量亦有變動，本身因為公司註銷股份持股量由4.97%變回佔已發行股份5.08%，近日又由5.08%減持至4.96%，筆者估計業績公布前FMR LLC都會不斷減持其73,655,500股，雖然不會跌太多但呢個貨量足以令股價壓在這個水平，等私有化嘅朋友都要再等一等了。
貿易戰陰霾 隻嘢不跌反升
上周當大家的焦點放喺熱炒中嘅小米集團—W（01810）同時，筆者就挑了一隻算係研究咗好耐嘅股票布萊克萬礦業（00159）入監察名單，呢間公司只要上網GOOGLE下就不難搵到以下資料：（一）公司主要從事於澳洲收購、勘探及開發鐵礦石項目；（二）於中華人民共和國（「中國」）開採、加工及銷售銅精礦及其他礦產等礦產資源。本來呢隻股票呢一年多股價一直在0.1元左右徘徊，睇盤路左右兩邊都係疏疏落落，明顯係無乜人參與嘅股票，同埋呢類礦類、資源類公司太易偷錢，屬於唔太吸引嘅類別。至於筆者但點解遲遲都唔動手買少少，主要原因係唔想令資金綁死，呢啲股票買咗落去好可能長期「左邊冇人」，到時要套錢出來就會好麻煩。話說當初令筆者注意到嘅係CCASS入面持股頭三大的其中一間券商雲鋒證券，放得啲貨入去而且數量不少嘅，同得雲鋒證券交手都係賣盤後變成粒天王巨星，更何況當時布萊克萬礦業只有約10億元市值。
其實呢間公司股價由「2015年大時代」開始由0.3元幾碌落嚟0.1元都差唔多兩年幾時間，大股東桂四海最近一年不但無減持，仲喺低位增持股份，加上建議批出1.455億分購股權畀公司董事，增加了筆者對研究佢嘅興趣。相信最近貿易戰陰霾下，好多讀者都有一番感受，試諗下個市連番下跌同時，呢隻布萊克萬礦業不跌反升，兩三下就由0.1元踢高到0.2元以上，開始有番啲成交之餘幅圖又靚到咁，值得諗下。
【權益披露：本人持有利福中國股份】
Facebook 專頁：財技戲法
