作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
主板殼價大跌至5億幾
如果有睇開公告都知都殼價已經跌咗好多，最新主板成交殼價係5億至5億半左右，大家睇最近朸濬國際（01355）同埋瑞港建設（06816）兩單賣殼就知，你可能會話一單半單唔代表啲咩嘅，咁筆者呢個星期就約咗兩個大佬W君同埋D君出來飲茶，跟得兩個大佬出來梗係唔係飲飲食食咁簡單，大家埋枱就分配工作，服務對象主要係一兩間幾十億元市值嘅上市公司。席間梗係把握機會問下啲大佬最新殼價係點，始終佢哋出來跑「刁」最接近市場，等於你問隔籬屋黃師奶、樓下張太就一定答到你街市邊檔啲魚最平最新鮮，邊一檔菜檔「呃秤」因為佢哋每日都要去買餸煮飯，就算邊間超市加價一毫子都瞭如指掌，所以唔好睇小師奶嘅威力；講返嗰日D君就話殼價跌得好急，大約跌至5億半元左右，不過佢話雖然跌咗好多，但間中都有老細問價，只係無以前咁暢旺。
上一期講到華誼騰訊娛樂（00419）即將在9月份納入返深港通的名單，最新慢慢上升至0.395元收市價，有睇盤都會留意到最近都出幾多大牌睇場，UBS、高盛、大小兩摩等等，每間淨係開個ACCOUNT都最少5球美金起跳，所以唔係有大動作都無人信喇。呢幾日大陸繼續都係講范冰冰同佢細佬范丞丞被人拉咗單NEWS，而華誼就公布同羅素兄弟嘅交流會活動。第一兩個國際大導演都忙緊做《Avengers4》後期工作吧，如果唔係有咩大利益又點會花時間同你做交流會呢，無獨有偶兩年前華誼就同羅素兄弟以60%對40%在美國成立一間主要拍如《Avengers》類超級大片的電影公司，當中細節有講明華誼可以將所持股權轉讓畀華誼騰訊娛樂同埋雲鋒基金，其實講來講去都係等佢行呢步，呢單嘢無咗聲氣咁耐，依家羅素兄弟又同華誼叫做有少少嘢搞，唔通好事近？
傳統經紀生意難撈
講開又講，做證券經紀呢行都越做越縮，人哋有最低工資但經紀就無最低佣金，啲價俾啲人搞到做爛晒，以前收客0.25%（俗稱25滴）都不知幾好做，依家出面電xx碼收5滴或者最低收費25元，一x每個Trade收5元，有啲更離譜免佣，其實如果個經紀幫你搵到錢，區區小小佣金又有乜所謂啊，證券市場就好似我哋以前魔術嗰行咁，我哋專業做表演嘅收開4,000-5,000蚊一場SHOW，就有班人去執幾件道具就去接Job，到頭來有人會話你5,000蚊收得貴，人哋阿邊個都係收800元，我直接不客氣講：咁你搵阿邊個啦。今時今日經紀呢行如果唔係好似我哋呢啲有小小人脈，有啲大佬射住都係越來越難撈。
【權益披露：本人持有華誼騰訊娛樂股份】
Facebook 專頁：財技戲法
