作者：Sammy – 畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
同得仕第二代接捧 「孖五」好抵買
上星期，筆者有推介朋友買意科集團（00943），轉眼間收市已達0.29元。最可笑是「頭巾肥仔財演」喺佢Facebook大大聲講話沽晒佢，仲叻唔切咁貼咗張最近興起疑似「微信叫買00943散貨CAP圖」出來㖭，講真自稱係財技股專家仲開班教人，都好心佢俾啲誠意Check下中央結算及交收系統（CCASS）數下倉吖，明明早幾日仲話意科集團供乾咗，轉個頭就咁快沽清咪顯得自己道行未夠囉，因為今次供股規模係差唔多有57億股，而公司執董包銷晒42億股左右，最近「頭巾肥仔財演」話自己沽清貨時頭十間證券行減持都無超過一億股，明明睇盤路係「有心人」接了大部分價都懵然不知，「左邊」啲買盤炸晒落0.17元都出唔到一億股啦，仲學人出盤路書教人睇盤、開班教人，不如學下「不知羞恥」四個字點寫，不過可能佢會話，我呢啲ABC（Absolute Bastard Crumbs）淨係識英文咋：I do not know shame吖嘛，Right？（JM Tone）
剛剛執筆之時，同得仕（集團）（00518）更新了一份公告，終止出售兩間附屬公司，分別為「同得仕貿易」和「昇陽海外」，因為之前寫文推介了都要負點責任。第一，這次出售是一個關連交易，出售的兩間公司都係賣俾大股東，要賣都唔使搞咁耐啦！如今終止出售無疑係內部股東、董事傾掂咗數；第二，如果大家有睇份公告，就會留意到集團嘅創辦人董華榮因為想更多時間改善身體為由，辭任公司主席同埋執行董事職位，取而代之就係佢個仔董孝文擔大旗，佢堂兄董偉文就做公司董事總經理同埋授權代表。
呢次公司交棒後，仲有兩個執董都加咗人工，換血對公司嚟講都算係一件好事，始終舊人會對自己親手創辦嘅公司不捨，新人接捧後好可能會為公司帶來一番新景象都未定，同埋下一代炒賣股票「響朵」嘅心同埋賣殼機會都會大啲啦。
上次筆者在Live節目推介過中星集團控股（00055），呢隻「孖五」其實相當抵買，以現價0.56元計只有1.42億市值，翻查過去記錄大家會搵到公司前身叫「中大印刷」都未必太熟悉，但如果係Neway母公司相信大家都會「哦」咗一聲出來，就算無買過佢都去過Neway唱過K吧？呢隻「孖五」呢六年來做過兩次合股，兩次都係10合1，即係已經100合1了，咪睇佢大股東得16.2%，其實之前做過兩次一般授權配股，相信橫手倉佔比不少，未計及殼價淨係NAV都已經有9.34億元，簡直係抵買到爛！
Facebook 專頁：財技戲法
【權益披露：本人持有同得仕（集團）、意科控股股份】
