作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
殼價跌因在哪？
上回提到殼價跌至5億半左右，因為有讀者要求分析殼價下跌原因，筆者稍微寫多幾筆吧。殼價下跌其中主要原因係港交所推出打擊賣殼活動嘅諮詢文件，從幾方面著手包括提高養殼成本，有權質疑上市公司業務是否足夠維持上市地位、將上市後禁售期延長以及增加注資難度等等，雖然你可能會話養殼成本高咗，咁隻殼咪賣貴啲囉！等於麵粉貴咗人工貴咗，咁個麵包都應該賣貴啲喇啩？無錯，但搞咁多嘢不如自己收埋造印鈔機；另外雖然市場有「期殼」，但問題係本質上係有違買殼本意，個老闆買隻殼返來就係為咗要快，為咗了免除咁多上市審批，或者佢個業務或資產根本不足以上市先買吖嘛！依家注資都咁麻煩，夜長夢多交收又麻煩咗。除此之外，依家多咗啲公司叫新經濟公司如生物科技、互聯網金融、新能源之類嘅公司唔賺錢都可以上市，就舉平安好醫生（01833）連蝕幾年錢都可以上市，有咗呢個渠道，上市公司多咗，供應都多咗，幾重打撃殼價唔跌就奇。
事出必有因
世間萬物都有佢存在嘅理由，等於以前有人問過筆者「肛門最重要嘅功用係乜」，筆者自問愚笨，諗咗成半日都諗唔到個真實答案，一般人都係答用來痾屎之類嘅答案，點會諗到個終極答案竟然係用來「剪屎」！正如筆者都曾經講過，世界上沒無緣無故嘅愛，利福中國（02136）呢一隻筆者嘅愛股終於喺今日業績公布之日，大市跌幾百點之下逆市向上升近10%，「細劉」曾經在6月25日一直連番曾持到73.92%，到7月10日先停手，所有嘢都唔係無目的去做，先回購完再註銷股份，然後同一日開始增持到7月10日，點解係7月10日而唔係7月20日呢？之後公司出咗董事會公布業績日期嘅公布就明白晒，因為中期業績定喺8月13日，因為業績前一個月董事係唔可以增持同埋公司係唔可以回購股份，筆者記得年度業績好似仲要限制業績前兩個月㖭！大家試諗下，「細劉」校到個時間剛剛好，好似趕住去痾屎衝入廁所咁增持至將近大股東上限水平75%，又咁啱同時FMR LLC又會咁巧減持低過5%之後畀足成個月佢減持，做咁多嘢唔會淨係為咗個果盤啩？筆者看好業績後利福中國表現，早排公司宣布出售餐廳「和三味」予利福國際（01212）整合業務，筆者就繼續等，睇「細劉」大顯神威，或者首先出售大陸已經停止營運嘅大連久光百貨都唔奇。
【權益披露：本人持有利福中國股份】
Facebook 專頁：財技戲法
