作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
押股借錢都唔係咁易
最近股票圈都有大大小小唔好嘅事發生，先有CEC國際控股（00759）老闆過身，藍鼎國際（00582）老闆因為傳涉及華融案喺柬埔寨金邊俾人拉同時澳門輸大過百億元，繼而又有新股臨差唔多上市叫停等等。點都好，759大炒嗰日之後，好多細股都有少少郁動，始終大股仲未有運行，只要細股市場好番少少，會係好多市場人士樂見之事。
證券行經紀 喊生意難做
依家唔單止大陸，香港都係非常水緊，好多上市公司老闆急住要資金借錢都會選擇抵押股份，即係按股借錢（國內叫質押股份），但借都唔係話借足畀你，假設間公司市值10億元先算，而大股東持75%，同時一般證券行畀30%按揭比率，即係話大股東持貨7.5億元，理論按到2.25億元，但一般嚟講都係唔會借足全數，仲要好多細行都唔會借到咁大條數出街，多數都會拆開射畀行家做，去分散風險。對於證券行嚟講接呢啲生意返來做其實都好矛盾㗎，因為條友無錢周轉唔嚟先會押股問你借，但你借俾佢又有高息喎，起碼都十幾厘息一年，都算係主力收入來源；在於經紀立場有生意帶到返公司又有得拆息就梗係皆大歡喜啦，但係個客旅還唔起錢個經紀都要上身，唔通真係斬佢手貨咩，好多時流通量都唔係大，基本上都無貨可以沽，所以生意還生意都要考慮呢方面風險。
上市公司老闆嘅煩惱
依家唔係話大股東拎住75%來按股票就叫安全，呢一排其實通常大股東要借錢好多時都唔借的，因為無錢還變相要咗佢隻殼，拎隻殼返來又要搞一大輪，加上殼價跌咗相應按股價值又會有所調整。而家好多上市公司老闆都係空心老倌，筆者最近得知一個老闆（唔方便開名）有兩隻殼揸手，好多人以為佢好有錢點知都係最近不斷喺出面撲水但都仲係借唔到，所以唔同階層嘅人都有佢面對唔同嘅煩惱，一個打工仔可能每月煩緊找幾千元卡數嘅同時，一個上市公司老闆就係煩緊幾千萬都借唔到嘅問題，到最後可能普通人會幸福自在啲都唔定。
有網友問筆者究竟華誼騰訊娛樂（00419）將會注入嗰間美國合資公司係咩來頭，咩都咁值得期待呢？呢度就講多少少，其實間合資製片公司叫「Agbo」，華誼兄弟投入2.5億美元用於營運，另加1億美元用於製片，折合總數27.3億港元。大陸華誼兄弟佔60%，羅素兄弟佔比40%，華誼騰訊娛樂同埋雲鋒基金可以受讓華誼所佔的股份，咁大陸華誼兄弟同時係華誼騰訊娛樂主要股東，所以到時就會間接注資入去華誼騰訊娛樂。呢間合資公司由2016年8月29日開始成立至今差不多兩年時間，最近在一場激烈嘅版權爭奪中買咗熱門繪本小說《電氣國度》（The Electric State）嘅電影版權，佢哋將會邀請《小丑回魂》導演Andy Muschietti執導呢部電影，呢部將會係大製作並且會打算全球上映。大家試諗下羅素兄弟之前作品《美國隊長3》都曾經大收過百億元票房，嚟緊9月10日入返深港通，假設注入呢間勁嘢就掂晒喇。
【權益披露：本人持有華誼騰訊娛樂股份】
Facebook 專頁：財技戲法
