作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
大跌市下的收入來源（二）
「侵侵」出完口術之後大市升完過千點，結果都係喺周一（11月5日）跌返600幾點，始終美國中期大選呢個月都係大上大落架喇，所以筆者先一連寫兩篇跌市下嘅收入來源，雖然好多人都知，但筆者亦相信好多讀者都唔知我哋呢行係原來有咁多搵錢方法。正如十多日前，網上踢爆有豬扒港女呃飯食收回佣一樣，仲要一日食勻十幾餐，所以話呢個世界都係無奇不有！講真，老實咁講，豬都咁都有人請食飯有兩種可能性，第一就係有類「毒撚」（呢度唔算係粗言，只形容男性）佢哋會覺得豬肉都係肉，好又一餐唔好又一餐，或者有下文呢，熄咗燈都係一樣啫！第二類男人係會覺得出到嚟臨陣「縮沙」會好無面，或者佢哋係怕事軟腳男焗住請食飯係驚「豬扒女」發難，因為同靚女嘈，其他人都係覺得你哋耍花槍，見到你同件豬扒嘈，唔笑到你面黃都對唔住自己啦！
上期簡單講過有部分人會幫手做IPO「頭」砌飛，今期繼續講下跌市下有咩搵錢途徑，當然除咗筆者每個月都會接下婚宴MC、魔術表演、搞下馬會單欖之外，都仲有其他方法嘅。同做IPO頭類似嘅有幫人坐貨，之前有追開文嘅讀者應該知筆者都有講過「摸X」成日喺Facebook貼出來「也文也武」嘅廣州基金國際控股（01367）話自己贏幾多、幾低成本買入咪又係做「人頭」，啲貨都唔係佢嘅，佢代持之嘛，但佢同時收高息又可以貼出來做課程宣傳威威子，完事後仲有人送隻錶畀佢，當然佢會貼出來話自己買啦。其實有好多公司收夠貨之後就會配手「花」出去，咁個經紀就會搵多幾個大「頭」去接呢批貨，當然同個「頭」做晒事前溝通，電話錄音一定做足無問題啦。呢啲唔好話好高息，假設坐貨三個月畀10厘息，你拆2%，有五至六張四百萬元大飛就肯定夠食，因為呢度已經收幾十萬元。
除咗同股票有關嘅，仲會有電影融資銷售。依家在大陸火爆嘅網絡大電影，簡稱「網大」，只係投資區區數百萬元，放在優酷、愛奇藝等大哥級平台，計嘅唔係票房而係點擊率。幾百萬完嘅投資，隨時收過五千萬點擊率，投資人可以收返一半即兩千多萬元，扣除成本後嘅利潤以幾倍計，可以話係超高槓桿投資。依家「網大」開始發展成熟，投資規模都做返大啲，集資額由800萬元至1,000多萬元都有，通常有六成已經有老闆認投，其餘四成就可以sell客投資其中賺取佣金。呢種網大由開拍到收成大約一年多，但勝在透明度高，所有拍攝進度、資金消耗進度、甚至投資人可以一同出席開鏡切燒豬、慶功、酒會等宣傳活動，加上回報高，有興趣嘅人自然好多，因為過往數據幾垃圾嘅網大都有錢收的，始終大陸人多只要包裝靚仔少少就有人畀錢去睇。
【權益披露：本人沒進行上述活動】
Facebook專頁：財技戲法
