作者 : Sammy—畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
信越現階段輸面低
近排筆者有多樣嘢做，就係跟大師潛心修練吞火之術（Fire Eating Stunt），吞火呢門技藝同四川變臉一樣唔係度度都有得學，等於「做莊」、「市值管理」之類嘅嘢唔會有一個專門課程畀你去報名，只有你邊做邊學或者咁啱得咁橋遇到個前輩肯教你嘢，如果唔係真係有錢都學唔到，正所謂粉紅色「Linter」，可遇不可求。（讀者可以解讀為天然的粉紅色棉）
近排個市底都係弱，但細股市場似有番多少起色，例如圓通速遞國際（06123）可以一口氣由低位2元踢返上接近3元樓上，好多細股都有10幾至20幾percent嘅升幅，不過都係建議大家有水位就食，身邊好多朋友諗住搏多日升多棍就瀨嘢，通常都會蟹咗喺度。湊熱鬧的玩法筆者多數只會玩兩轉，講真賭場日日開，又何必同佢鬥死一隻呢？
伺機炒上的工程股
其實有好多股票已經跌太多，或者跌入一個非常超值範圍，信越控股（06038）就係一個好例子。呢間公司2017年6月13日上市，上市招股價0.41元，現價0.275元計市值只有2.75億元，已比招股價下跌接近23%。公司主要從事提供有關香港平台外牆及幕牆工程的一站式設計及建造解決方案以及維修及保養服務，呢啲生意可以話係長做長有，同埋主板殼價最近都係能夠企穩5億元，公司手持現金已達1.27億元，佔現總市值差不多一半，相對有一定嘅防守力。另一點值得加分係呢間公司借貸比率低，又係之前最熱門嘅建築工程殼，筆者相信現階段可以適度分注再加碼，始終大股東一直持大貨在nonccass沒有任何沽售動作，而且公司股價嚴格上嚟講都無大炒過，最多只係將股價踢高至0.61元只係高招股價50%，如果係要散貨，平均都起碼要踢高一倍吧。睇盤路如果要買確實係有一定難度，要買的話筆者會直取右邊嘅貨，如果要買嘅數量唔係多，分幾日一定可以偷到雞，之後就坐定定等佢上。
有好多讀者包括身邊朋友都對利福中國（02136）信心有所動搖，其實唔太需要驚，始終細劉持貨高達74.91%接近大股東持股上限，可見佢對公司股價前景係有一定信心，只不過幾時反映實質價值就要考耐性，因為短期股價下跌或者炒唔起對一個超級富豪嚟講絕對唔會影響佢生活，對於散戶只要無耐性或者咬住個股價橫行一年半載就已經係非常痛苦嘅事，都係嗰句啦，買股票所用嘅錢千其唔好影響自己生活就得喇。
【權益披露：本人持有利福中國股份】
Facebook專頁：財技戲法
