作者 : Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
新華教育繼續發力 康利國際宜低吸
上次推介的中國新華教育（02779）已不知不覺間由1.84元踢高至1月21日收市價2.2元，始終睇成交未算好大，有貨嘅讀者可以繼續Keep，筆者預計下一站可以繼續食住個勢挑戰2.5元，假設之前上一個頂都破到位就由得佢放紙鳶。至於上一篇文章推介的康利國際（06890），由於筆者周一（1月22日）交稿，趕周四（1月24日）出街，1月17日股價已經踢上16%，其後高見1.22元，到今日收市價回落至0.99元又係安全水平，未買嘅可以考慮加少少。
有讀者問我係唔係睇到大股東增持股份就可以All IN？當然唔係啦，都要睇大股東大到咩程度，如果佢只持有三成股權又無其他主要股東，咁佢都依係大股東，但好多時增持只係Misdirection，減持橫手貨先係最終目的。另一方面，都可以睇下個增持時間點係唔係位於股價長期低位，而同時有無消息動作配合，假設踢高幾倍先來增持，同時所持股權又唔算好多，唔可以話唔會再踢上，只係呢個情況跟追上去風險會比較大。
市值管理與深港通
無論旺市淡市作為經紀嘅行家們都要搵食開飯，好多時淡市期間真係搵個新客去炒股票都唔係咁容易，好在呢一行呢瓣搵唔到食咪搵第二瓣囉，就好似市值管理咁，好聽啲就係叫市值管理、市值優化，講白啲即係打成交做交波隊。當然傾到呢啲返來做就大家兄弟叫做日日有工開，但都要睇個老闆係打幾多個月成交，如果係多數最少都半年至一年。依家多咗深港通呢個賣點，大家都知進入深港通主要有兩個條件：第一就係要過去12個月平均月底市值達到50億元，有好多人會諗咁我間公司月頭30億元，到月尾嗰日先踢返佢上50億元可以嗎？咁就錯了！因為仲有第二樣條件，就係本身要係恒生綜合大中小型股指數嘅成份股先得，而點先可以入選到成份股呢？就係要從每日成交量、成交額、市值去界定，所以係絕對無得偷雞嘅。依家市值管理sell老闆入深港通都係一個賣點，想入去首先個成交要做返大啲、又要做長啲時間，更何況入咗深港通名單後都要繼續打成交去維持不被剔。
有好友提供「微信女」兩隻「堅料」，分別係共享集團（03344）同埋彩客化學（01986），大家醒水起碼避開呢兩隻毒料。
【權益披露：本人沒持有上述股份】
Facebook 專頁：財技戲法
