作者：中環高跟鞋，我哋係一班來自不同財經微信公眾號的本土派小編，但我哋唔會掟磚，亦唔會掟蕉，我哋最多係掟文，尤其是同大家分享未來值得留意的投資亮點，雖然暫時只有《中環高跟鞋》、《荊香撲鼻》及《投資先機》三個號的小編在此，但唔排除可見的將來會有愈來愈多小夥伴加入……
Hi-tech嗨嘢
小妹誤打誤撞下入了財經公關這一行，自入職以來，每天就要處理一大堆數字，被上司灌輸處理數字要萬分小心，不能錯數字，不要錯千位的逗號，將數額翻譯至英文要小心，人民幣定港幣等等，但最最最不能錯的就是將客戶的數字外泄，這是「災難」的首位。
今年剛剛踏入繁忙的業績期，市場上便發生一單災難。洩密者就是「鼎鼎有名的關公」皓天財經（01260），佢地竟然將一隻手遊股IGG（00799）全年業績路演材料流出，當中包括2018年純利、按年增長比率、每股盈利等，幫公司偷步公布全年業績。雖然佢地發現後已經即時刪除有關資料，但而家嘅互聯網世界，人人都識得Backup功能，所以資料已經通曬天。公司唯有即刻停牌將市場影響減到最小。
IGG原本透過旗下皇牌遊戲《王國紀元》錄得穩健貢獻，去年純利更達1.893億美元，由原先股價大市造好，變相需要即時停牌，以待澄清報章報道及刊發全年業績，你話呢隻手遊股幾慘慘豬呢？
而大家知唔知造成今次流出嘅途徑喺咩呢？就係皓天財經嘅金融服務平台「皓天雲」，「皓天雲」係佢地推出嘅一個手機應用程式，原意用於發布財經資訊，包括佢地上市客戶嘅新聞以至新聞發布會直播等等，但而家變成資料流出嘅軟體。現今人人都追求高科技產品，但唔係所有高科技產品都有用，今次皓天財經就比佢地「舊雲」搞到所有人都睇到曬業績，唔知以後上市公司在投資者關係上仲想唔想追求「Hi-tech」，還是擔心「Hi-tech只會嗨嘢」。
財經記者、一眾行家及分析師對今次事件議論紛紛，有年輕同事問，搞到咁件大事，客戶會點處理皓天財經？少年，你太年輕了，皓天財經同「客戶關係咁好」，應該可以傾得掂既！不過，笑還笑，小妹認為一眾行家都被今次事件拖累，客戶要把未公布的數字交給公關，當中存在信任，今次泄密令上市公司、律師等對公關公司又起了誤解，這對日後公關同行做事都有直接影響。
說到業績洩露，其實除左今次嘅IGG外，以往熱炒股騰訊（00700）、滙豐（00005）皆試過類似事件，所以話做公關除左靠關係之外，做事一定要細心先至唔會引發起關公災難。
