作者：Sammy – 畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
早知就咩咩咩啦嘅股票
睇開專欄嘅朋友仔，都一定知道文章出街前，要四至五日前交稿，所以一定有Delay，希望讀者們唔好對住我講「Delay No More」就得喇。
上一篇文交稿後，華誼騰訊娛樂（00419）大炒上至0.6元，而不幸地文章出街之前一日（周三）就由0.61元開始下跌，看其盤路主要沽出的是雲鋒證券和富昌證券，首先講講雲鋒證券，呢間證券公司前身叫瑞東環球金融，就係高振順將佢賣俾虞鋒、馬雲，然後改名雲鋒金融（00376）旗下嘅證券行，在華誼騰訊娛樂於2016年2月5日成功易手後，印出來的新股有一定數量存入去雲鋒證券，而呢批貨個數目就同當時印俾其中一個投資者雲鋒基金，同埋幾個投資者係差唔多的，所以筆者有理由相信呢次雲鋒大手減持都係佢哋，因為「披露權益」曾更新過雲鋒基金上年曾將華誼騰訊娛樂股份一度減持低過5%樓下，之後再減持是不需要披露的。
另外，剛好中央結算及交收系統（CCASS）周五更新了，原來兩日前雲鋒減持了1.02億股，當日法國巴黎證券、德意志銀行、招商證券國際同時增加了1.22億股，以頭兩間證券行計絕對唔會係散戶行啦，入得去開Account都唔係一般人，而且仲要接咁大手貨。所以，筆者認為係自己人接了批貨，可能當初易手時呢啲人頭Account同幕後日預先Deal好平均咩價錢在板面交收，始終都方便過做Bought Sold Note（股份轉讓）。唔經唔覺呢篇文章出街之後，就係易手已經兩周年，大家一齊期待佢份注資公告吧。
交代完「華騰」之後，今期要再度提醒大家買入安保工程控股（01627），記得筆者在直播節目有推介過俾大家，當時股價都係0.61元至0.62元左右，首先呢間公司係由「15號仔」盈信控股（00015）分拆出來，乾度十足。現價0.58元計，公司市值只有11.6億元，若果計埋佢公司現金11.2億元（如果派晒特別息就和味喇）同埋資產淨值10.88億元，加上主板殼價，現時已經係相當超值。
所以，去年9月份時已經忍唔住叫大家買，如果當時有買到依家都係坐住啫，最多咪坐吓囉！因為佢2月20日就夠上市一周年，真係值博率超高嘛。想當年（其實係呢幾年），「15號仔」曾經分拆過兩間公司在主板上市，兩間都賣咗殼，兩間公司賣殼後都有N倍嘅驚人升幅，仲要係一夠鐘（指上市一周年後）就賣；呢兩隻分別就係比速科技（01372）10倍股同埋金誠控股（01462）40倍股，安保工程控股仲要係魏生（魏振雄）未計橫手都揸75%，希望到時唔好有讀者再Facebook私訊我，然後好後悔咁講呢句：「早知就咩咩咩啦！唉！」
【權益披露：本人持有華誼騰訊娛樂股份】
