作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
應該出絕招捏住稀土供應
筆者近期愛股御德國際控股（08048）氣勢如虹，能夠踢上喺0.26元位置，證明呢一次一般授權配股成事機會都差唔多有九成，執筆之時仲有一日就係最後日期，到時出埋份完成配股公告就可以有望繼續再展升浪喇。
中美貿易戰越搞越麻煩，始終「佢老美」都係大聲夾惡，老老實實自己又唔係生產大國又唔抵得，本土無呢個人力同技術去做到中國咁Mass Production，如果硬要轉返以前做工業同製造業根本係無可能。華為單嘢就更加好笑，唔抵得我哋中國華為有5G技術，就硬要安放一個罪名畀佢話係危害國家安全，依家發展到Google都要封殺佢，將來就算有機都用唔到Google Play，市面普及排第一的智能手機作業系統就係Android，係由Google公司成立嘅Open Handset Alliance持續領導同開發，第二就係Apple嘅iOS系統，兩者已經佔成個地球九成六市場佔有率，其實得返幾個%係Windows Phone、BlackBerry佔比，以前仲有一個叫Symbian作業系統係由Nokia公司擁有，不過2013年後就停止開發。依家華為無作業系統用係好大鑊，起碼對歐美市場有一定嚴重影響，不過筆者相信中國開發自有一套普及又強大嘅智能手機作業系統，起碼唔駛淨係得小米嘅MIUI。
稀土戰開打？
依家美國玩拉閘，中國大可以出絕招捏住啲稀土供應量，稀土其實係指稀土金屬，其中包含17種化學元素：鑭（La）、鈽（Ce）、鐠（Pr）、釹（Nd）、鉕（Pm）、釤（Sm）、銪（Eu）、釓（Gd）、鋱（Tb）、鏑（Dy）、鈥（Ho）、鉺（Er）、銩（Tm）、鐿（Yb）、鑥（Lu）以及與鑭系的15個元素密切相關兩個元素：鈧（Sc）和釔（Y）。因為無咗稀土就無辦法生產智能手機，呢樣係一樣非常「絕核」嘅事，美國令Google封殺華為，變咗華為有機都無用，中國再製裁美國稀土供應，甚至連部機都做唔到出來。咁其實除咗大陸仲有無其他地方係有稀土呢？答案係有的，第二供應量最大嘅國家係澳洲，但佢嘅供應量只有中國嘅百分之二十，第三大稀土金屬供應國係俄羅斯，但又同大陸Friend底所以都係無計。好似話日本喺太平洋海底搵到個極大嘅稀土礦，不過海底開採又係有環境污染問題，最後都係要靠中國。不妨留意隻中國稀土（00769），筆者其實無乜點研究，淨係知佢現價0.37元，市值都有8.66億元，現金已經有16億幾，就睇下有無得炒下。
【權益披露：本人持有御德國際控股股份】
Facebook專頁：財技戲法
