作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
渝港國際列入監察名單
上次推介完隻香港國際建設（00687）都有些少升幅，希望可以繼續Keep住走勢，等有買嘅讀者可以贏多啲。最近隻隻新股都爆炒，但唯獨個大市成交真係少得可憐！其實呢樣嘢都只不過係歷史重演，早兩年前大家仲記得閱文集團上市嗎？當時大市成交都係細到無朋友，個個散戶大戶都係留番啲錢來抽閱文，變咗市場嘅資金一時之間變相抽乾咗；最近嘅情況都不遑多讓，嚟緊有一隻超勁爆啤酒股百威亞太（01876）上市，搞到最近大市成交金額全日都係得嗰500幾億元。
今次筆者將渝港國際（00613）列入監察名單，今年年初羅琪茵以每股0.175全購要約，要約完成後持68.08%股權，要約完成後立即放自己人入去，不外乎都係中國透雲（01332）、茂宸集團（00273）呢啲同系有關聯公司嘅人。安排好人事變動之後，公司極速宣布改名為「梧桐國際發展有限公司」，而公司總辦事處同埋營業地點就改為「中南網絡」嘅大本營華匯中心，想當年中南網絡又叫「華匯系」，講到尾背後都係一個猛人莊友堅，話說羅琪茵係維他奶家族後人，同莊友堅算得上係門當戶對，而家羅琪茵順理成章幫手出面全購渝港國際，仲要最近都動作多多，以2.7億元收購了一間叫Liberty Capital公司52.63%股權，呢間公司主要業務為財富管理、放貸同埋物業租賃。呢間都應該算係友好公司，事關收購前渝港已向目標公司提高無抵押循環貸款，貸款協議日期為上年的12月中。
就咁睇現價0.13元，公司市值只有13.49億元，仲要比羅琪茵嘅全購價0.175折讓一成幾，最近一篇採訪文章入面都有提到莊友堅稱不會視渝港國際為「細價股」，會作長線投資咁話，佢話唔係咪唔係囉。
