作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
突然之間賣得貴嘅殼
大市周一（7月15日）跌唔落，百威亞太「縮沙」，借爆了孖展抽的朋友就慘了，要無辜蝕息；不過都應該會有正面反應，始終之前凍結了的資金會再度釋放出來，但願如此吧。
成交細氣氛差嘅環境，買賣殼就自然近乎絕迹，不過上周剛好有一單全購賣殼：KEE（02011）。集團的主要業務為於中國設計、製造及銷售條裝拉鏈、橫機羅紋及其他服裝配件。呢次全購「耀帝」作為賣方以總代價約5.46億元出售已發行股本70.16%，買方分別為三間公司：China Sun認購28.85%、Central Eagle認購26.74%、Golden Diamond則認購14.57%，而Noble Wisdom為擔保人兼金主，計及每股要約人價為1.677元，以上頭三個為聯合要約人，即收返來嘅理論上都係按比例分配番。睇番公司近兩個財政年度都係虧損狀態，而且都係以幾千萬計，就咁睇佢淨資產為2.8億元左右，但係因為有其中一部分為物業廠房設備，仲有存貨。間公司係生產拉鏈之類的，所以打個折扣比盡佢都係值2億元。公司已發行股數為464,804,000股，以每股要約價1.677元計，即收購總代價為約779,476,308元，減去理想資產淨值都有差理論殼價差不多5.8億元。
呢單刁其實有一個特別嘅背景，就係喺2017年8月，耀帝（作為發行人）及Noble Wisdom（作為認購人）訂立耀帝投資協議，而Noble Wisdom（下稱NW）已認購部分耀帝優先股，總代價為8億元。咁耀帝啲股份就按咗畀NW，原定第二筆優先固定股息原定於2018年2月到期，之後梗又係無錢畀，NW就發罰款通知書畀耀帝，耀帝再書面要求拖多三個月，點知到期又係唔畀錢，於是NW根據耀帝的經修訂組織章程大綱及細則正式發出贖回通知書，要求於收到有關贖回通知書後三個營業日內按贖回價9.2億元贖回優先股，耀帝就同意根據買賣協議的條款及條件出售銷售股份，全部代價將用於償還耀帝結欠Noble Wisdom的部分到期未償還款項。
賣貴殼 疑點重重
筆者同股友討論過，其實單刁非常可疑，間間都無賣到咁貴，點解唯獨呢隻KEE個殼價賣到咁Q貴？第二就係買家點解要拆散做三個，仲要每一個都唔過30%，啱啱好唔駛過觸發全面收購點，呢三個買家共通點係入面股東大部分都係做房地產、物業發展生意，究竟係唔係幕後人刻意安排嘅人頭呢？
【權益披露：本人沒持有上述股份】
Facebook 專頁：財技戲法
