作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
食平啲概念股
筆者上期寫的第二隻期殼股價表現太差，幾乎係一寫即跌，所以都無眼睇。公司生意一定有受影響，基本上而家好多人都係減少出街消費，租金已經簽好約就變得避無可避，難免短期都受壓，加上就算係期殼背後金主唔做嘢，個股價都只係會由得佢自由浮動。
鑒於現時經濟氣氛認真麻麻，都要諗下有咩相關嘅概念股，有時睇下蘋果、壹傳媒會員有無突破乜啲人數，咁大家可以睇下壹傳媒（00282）有無得炒，不過筆者對呢間公司無咩好感，始終佢嘅業務都只係不斷燒錢。鑒於中美貿易磨摩擦不斷膠著，中港兩地經濟都受一定影響，首當其衝受影響嘅一定係市民，好多人寧願留喺屋企減少消費，但始終離不開食。
筆者同友人講開依家有咩避險股或者概念股，大家都同一時間諗到呢間日清食品（01475）。話說日清食品在2017年底香港上市，當時招股價為3.54元，以現價6.16元計升幅足足有74%，如果計埋兩年所派發嘅股息收入0.073元及0.095元，回報高達78%以上。香港上市的日清食品業務主要範圍在香港及中國兩地，自家品牌都係廣為受大眾歡迎嘅「合味道」同埋「出前一丁」，最近仲同7-11合作推出多款非油炸杯麵，同日清合作公司有一風堂、豚王、博多一幸舍等多間知名日式拉麵店。儘管經濟開始放緩，公司上市後業績表現似乎未受影響，日前更出了一份盈喜公告，預期公司於截至 2019年6月30日止六個月之本公司擁有人應佔綜合溢利較2018年同期將大幅增加，主要原因係由於中國銷售量增加以及與來自銷售量增加相關的成本降低。
經濟環境唔好，一般人唔去玩唔買新衫唔去溝女都一定會需要食嘢，即食麵更加係窮L至愛，市面最受歡迎或者最有保證都係非日清莫屬，所以「食平啲概念股」就當之無愧喇。如果短炒計，現價留意6.5元短炒阻力位食糊，大力衝穿就Keep，跌穿5.85就止蝕。
【利申：筆者沒持有以上股份】
