P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：準備過寒冬
呢度唔講政治，淨係講下香港經濟情況有幾惡劣。筆者好多行家呻爆幾個月，有啲收市去揸夜更的士，有啲搵多份兼職或者夜班工作，眼見有個客做低端飲食生意都頂唔順，照道理經濟唔好啲市民會食平啲，應該唔太影響，其實主要原因係香港差唔多每一日都有「人群聚集活動」，身邊好多人收工都寧願快啲返屋企，因為唔知邊一區會有「Party」，加上港鐵由最方便嘅交通變得唔太方便，好多人驚食完飯都會無車返屋企。飲食業大部分都斷咗晚市，但又因為好多主力都係做晚市，基本上生意額係唔夠畀租金同埋出糧；好多老闆都萌生退意，但同一時間又進退兩難，繼續做要不斷交租，結束都會好傷又唔捨得，因為按金都有幾個月，覆巢之下豈有完卵，以十萬元計都幾十萬掉鹹水海。冰封三尺非一日之寒，除非有明顯改善，如果唔係筆者預期不久將來會有大量的倒閉潮，到時失業率會持續上升，大家要有心理準備過寒冬。
大市值股份一樣有危機
大家唔好以為大市值股份就無問題，一般大市值或者大價股都係畀散戶感覺係有規模、有實力或者係比較穩陣，其實呢個只係一般散戶一廂情願嘅諗法，淨係計今年都有唔少大市值股份跌到得設幾億市值，筆者身邊已經有客因為啲大市值股份跌去八九成，就以為好抵，衝入去撈底博反彈而「奶嘢」。其實好多呢類公司都係深藏危機，正所謂「馬屎皮面光，裡面一包糠」，最近一隻優源控股（02268）更加係繼承興國際控股（02662）之後大鑊中嘅大大鑊，高峰期公司市值差不多有60多億元，大跌前都係約30億元市值。公司抵押股份借錢，還唔到錢禁售期內斬倉焗住沽貨，大家睇CCASS都知沽到啲貨散晒，最大問題係公告講明呢單抵壓，係簽咗個條件，大股東不得持有抵於30%股權，違約就要賠夠差唔多25億元。如果債權人申請埋公司清盤仲大鑊，除非係自己有心搞出嚟嘅大龍鳳，如果唔係睇嚟都幾難翻身。
筆者沒持有以上股份。
Facebook專頁：財技戲法
