P5 財技戲法
Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：重組股必炒 睇準價先好買
筆者上周寫的龍輝國際控股（01007），轉眼間已由0.148元踢上至0.228元，升幅高達54%！就成交嚟睇個升浪應該未行完，另外就公司剛出了一份公告更新股權最新進展得知，因為大股東行使可換股債券後，持股由原來的68.37%增加至74.24%；同時公眾持股量由30.77%下降至25.06%，僅僅乎合上市規則。
公告入面都有一個亮點，就係講明賣方一及賣方二（即洪瑩女士和何磐光先生）就收購守則而言，在公告股權一覽表中分類為「一致行動人士集團」，但賣方一和賣方二都係非公司核心人士，在上市規則第8.24條下視為「公眾」，即係話公眾股東入面都仲有自己人。周一（9月23日）股價稍為有少少回落，亦曾一度跌到0.16元，最後收復失地守回0.2元以上水平。呢間公司前身為停牌好多年的大慶乳業，曾經搞到除牌第三階段，最後搵到白武士先變身依家嘅連鎖餐飲股，主要做內地火鍋品牌「輝哥」。之前嘅股東當然毫無疑問係死得不能再死，相比依家股價已大跌九成半以上，作為白武士的大股東手上持股成本都係0.1025元，炒上契機主要係最近兌換可換股債券消息刺激，當然如果大家去年心急入市的話一定會「奶嘢」，因為當時0.25元計比起大股東成本價高出差不多一倍，到今年年初先開始貼近大股東成本價，好多時呢類重組股等佢一年半載都係會炒鑊勁，年初計到依家只係九個月就嚟料。
廣州基金新寵兒
另一隻筆者近兩日有留意嘅就係北方礦業（00433），記得十幾年前公司前身叫新萬泰，仲玩過佢一轉供股添，十幾年前財技未有咁盛行真係易到不得了，不過美好的往事只能回味。就喺幾日前筆者見到佢出了一份MOU（諒解備忘錄），內容就係有關廣州基金同埋公司主要股東（15.78%）個仔「錢先生」有意認購公司新股份，亦擬將於緊隨潛在認購事項完成後擁有公司經擴大已發行股本超過30%，廣州基金出資3.5億元，其中1億元為現金，2.5億元為年初公司發給廣州基金的債券抵銷；而錢先生則以現金5,000萬元支付。其他嘢唔好講，就睇廣州基金個名都已經夠照，廣州基金入股某公司都有四、五倍升幅，呢幾日炒高完依家個價打返番落0.022元都算係機會嚟喇。
【權益披露：本人沒持有上述股份】
Facebook專頁：財技戲法
