P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：恒地夠晒穩陣 隨時價息兼收
呢排撞正十一國慶大陸放假，香港呢邊成交金額縮到得番500幾億元，行家們都呻爆話只係比乞食好少少，因為有冷氣歎。飲食業方面，筆者留意到除大集團外，一般位於鬧市內街的食肆會比較做得住，一來租金相對便宜，二來遠離大街大巷在最近社會運動嚟講，食客會覺得相對安全啲，生意一定係會少咗，但只要做好宣傳、抵食都唔怕維持唔到；就等於股票市場一樣，捱得過最壞時候就係春天。
記得當年「03年沙士」時，個個都唔敢出街，樓價平但無人敢買，股市都唔好得去邊；08年金融海嘯後都係滿目瘡痍，大部分人都驚到唔敢買股票或者無錢買，依家恒指都由高位跌去兩三成，好多高息地產股都處於低位，筆者比較喜歡恒基地產（0012），每年穩定派4厘幾息之餘仲有十送一紅股，如果係啲細價股向下炒嘅送紅股筆者就一定嗤之以鼻，但恒地絕對係優質股。除咗派息同送紅股之外，其實公司發展前景都好重要，例如恒地手持黃埔街重建項目，最近當紅以佢為《金宵大廈》拍攝藍本的香檳大廈收購項目都係公司嘅一大肥肉，喺正美麗華酒店旁邊，隔離左右又有美麗華商場、MIRA MALL、美麗華大廈等，將來起多間商場又好酒店或者寫時樓都好，隨時價息兼收。
另外筆者成日都主張啲怕麻煩唔睇公告，又自稱無咩股票知識嘅朋友買盈富基金（2800），有得派息之餘，基本上係恒指升佢就升，恒指落佢就跟住落，只要個市由高位大調整就係入貨時機，個市大跌後將筆資金分幾注買入就一定無錯，買完唯一要做嘅嘢就係乜都唔洗做等收息同埋個市踢返上高位食胡。
筆者沒持有以上股份。
Facebook專頁：財技戲法
