作者：Sammy畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
建德重組後有望爆升
新一年筆者喺呢度祝《炒股幫》讀者財福滿滿！身體健康！個個都不勞而獲，買邊隻升邊隻！
新年過後大年初五港股開市，三盛控股（02183）再度發力打上11.64元，加上筆者眾好友都多謝林生（集團主席林榮濱）呢封大利是，真係咁大個仔有史以來最大封。筆者份人就最公道，唔怕老實話俾大家知自己貨唔多，只持貨10萬股左右而已，不過市場上就有啲唔好嘅人為求開班Cap水，不擇手段去欺騙無知粉絲，筆者都看不下去，話說有個財演「暴肥瘋」呢半年一直自吹自擂話自己係三盛控股代言人，搞到一眾粉絲以為佢揸重貨，其實佢有嘅貨分分鐘連筆者三分之一嘅量都無，大跌市被震走完買唔番都扮晒勁出嚟認叻；出本財技盤路書話自己贏過千萬，實情佢成個倉得百幾萬，佢用嘅招數只係一個字：「吹」，可能就係咁連個節目名都叫《吹吹瘋》自嘲一番。
一直以來，佢在Facebook貼圖都只係貼買入幾多，然後話自己贏幾成云云；實情係一個沽出嘅記錄都無，佢當然無啦，因為佢貼出來就會露餡俾人知佢淨係贏得嗰幾格，人人叫佢「瘋Sir」，俾人知佢贏格仔咪好失威？所以最近筆者有朋友在Facebook叫佢貼啲沽出記錄出來即被佢秒刪，當然再有人問佢，佢一定會準備好標準答案：唔係事實嘅嘢我唔回應。正所謂君之愛財，取之有道，要靠呃人去搵錢，呢個人成功極都有限，總之大家小心呢種金融敗類啦。
推介股票之前都要跟進番隻同得仕（集團）（00518），最近披露權益又有更新，「股壇長毛」David Webb再度增持，以平均價0.8657元增持30萬股至6.01%，另外一個芬（Fund）都由6.02%增持至6.37%，大家會發覺明明之前Webb哥對上一次增持完得5.03%，點解多30萬股就咁大變化？因為過咗5%之後嘅股東，只要增持唔超過1%整數，就唔需要作出披露，即是話Webb哥佢鬼鬼祟祟偷番薯，又喺低位再加咗貨。
今期推介俾大家嘅股票係建德國際控股（00865），呢間公司係重組股，重組之前叫第一電訊，停牌七年有多，睇番佢個乾度真係十足十，因為Non-CCASS有70.02%，而頭十間行已佔23.14%，已接近龜裂程度。淨資產計佢有接近六億元，計埋殼價都同現價水平差唔多。重組完都未大炒過，加上呢間公司而家係做物業發展，呢兩年內房都水漲船高，相信嚟緊業績公布都會相當唔錯，兩毫子樓下入貨就肯定無錯喇。
【權益披露：筆者持有三盛控股、同得仕（集團）股份】
