作者 : EC執 – 全職注冊中醫師。新城財經台（重新睇健康）環節（正中醫理）主講。無論疾病或投資上的病痛，都用望聞問切去辨症，再用固本培元的方法去施治，希望投資路上的心得，可讓你藥到病除。
儲樓為樂
上次寫左「慶幸我窮過」，今次再分享下買樓的心得。
我認識一班以儲樓為樂的朋友，佢地大多都是窮人家出身，就因為佢地同我一樣窮過，所以好努力咁搵錢買樓上車。再一開二，二開四，四開八地以儲樓為樂。佢地好多人同我一樣，因為窮，就算凍飲加兩蚊都唔舍得俾多兩蚊，即使加凍飲，都是要有額外收獲，才當慶祝一下。當然佢地唔係窮到兩蚊都無，而係佢地知道要走出貧窮，係要經過身心的磨練。有個叫得寶村長的朋友，佢為左在得寶花園和淘大花園買多一兩個單位，決心死慳死抵，經常三餐只食午餐肉，最後俾佢成功地買下多個單位和車位，所以人人都叫佢得寶村長。我依班窮朋友好清楚，甚麼是窮，就算搵到錢買樓，佢地都係用窮人的心態去作選擇。而不似一些人，剛出來做事，以為自己人工高，眼角就高，諗住自己已不再是窮人，竟然以半山為買樓目標。我的這班朋友，大多數有自知之明，佢地的心態係窮人先在窮人區上左車先，唔理係大西北，只要踏上第一步，再見步行步。
現在香港的交通四通八達，其實要上車，買大西北又有何不可？但當然買自住樓和買樓收租又真的是唔同市場。自住樓考慮的是距離自己返工近、環境好、買野方便、開揚、實用。當買完層樓，供了幾年，在這幾年如果再儲到些錢，再將第一層樓加按或轉按，到時又多了些錢，這錢又可以用來做首期。如第一層樓自己名，第二層樓可以用先生或太太名，咁就可以變一開二。經常聽到有人話：「如我大西北買樓自住，返工好遠點算？」其實也可以用以租養租的方法：即將自己層樓租出去，用每月收的租金去搵一個方便你工作的地方租一個單位住。這就是以租養租，好處是雖然每月白交租俾人，但同時也有人幫你供樓。
另外，選擇投資樓，也有要注意的地方。以我等窮人計，除左考慮升值潛力外，當然是收租回報。所以我等窮人，好少會買新樓去收租，不是說新樓升值潛力少，而是要計埋新樓的管理費。現在好多新樓的管理費講緊5蚊一尺，如四百尺的樓，每月管理費就要二千大元。凍飲加兩蚊，每月無左一千次飲凍飲的機會。變相租金回報拉低了好多，所以剛開始選擇投資樓時，真的要問清楚管理費。當然選擇投資樓也要顧及交通的，因就算大西北，也有近大西北市區和偏遠的地交，近市區的樓一般都易租出。
總結，我等窮人要有窮人的「上左車先算」的心態去買樓，唔好學人眼角高，當自己是有錢人。香港地大把有錢人，窮人要做有錢人要先經過磨練磨練再磨練。所以我好佩服我身邊的窮朋友，佢地唔舍得俾兩蚊加凍飲，食的經常是午餐肉，為的就是儲多一兩層樓。
利益申報：本人持有自住和投資物業
（以上屬於個人意見，絕不構成投資勸誘或買賣建議）
