作者：Sammy畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
Kakiko Group繼續堅挺 中國綠島都唔錯
就如筆者之前喺北海道都有Post Facebook，三盛控股（02183）股價一路向北，股價一路屢創新高，每日收市都係變歷史收市價高位，上期講完「金融敗類」肥仔吹水瘋，可能佢有睇到筆者篇文啦，筆者收到風佢低位俾人震走完，依家又在13元呢啲高位加貨，真係追貨都追到氣咳，因為股價已累升唔少，佢加完都無筆者一半貨量（日日Fan屎前扮晒勁，但都未見過大蛇痾尿）。呢篇文出街之日（3月15日周四）就係三盛控股公布業績之時，睇個股價走勢呢份業績都會相當亮麗，因為未計及山東濟南塊土地同埋幾個項目嘅收益，福建平潭兩塊地嘅土地公允升值已賺到笑，所以周四晚已約埋好友「阿活」Eat Good West（食好西），邊食邊睇份業績。阿活係奇人，佢買呢隻貨量三盛都已經係筆者數倍，仲要係屎忽夠大勁坐得，佢都係由幾元坐到上來13.62元的，相信佢有絕對本事同筆者一樣坐到2字頭，再等待拆細。
就係上周五（3月9日）筆者就短炒買隻守益控股（02227），呢間公司上市三個月左右，現價0.95元，市值都只係7.98億元，細細隻容易炒，加上中央結算及交收系統（CCASS）第二大係潮商證券都有2.13%，相信Kakiko Group Limited（02225）過後，潮商效應依然仲喺度，因為隻Kakiko都未炒完，執筆當日先大跌再度倒升，其實早排都有老友收到風話佢要先踢上2元，然後就睇3元，睇個款個風係堅嘅，好有可能要踢到3元先肯收韁，不過始終升咗咁多，如果大家真係要博，都係小注好喇。
另一隻要推介嘅就係中國綠島科技（02023），呢間公司上市四年半，當年招股價係0.8元，2015年港股大時代嗰陣曾一度踢上3.3元，不過之後無以為繼，一直回來至現有水平。集團主要從事生產及銷售家用同埋汽車護理、空氣清新劑、個人護理同埋殺蟲劑、氣霧劑產品，以佢現價1.39元計，6.67億元市值都係好抵買，細市值炒起上來都慳水慳力嘛，話說最近有位朋友問我，兩間上市公司財務狀況如何？咁筆者就走去睇睇最近份業績，最後都係覺得呢隻中國綠島科技最靚，公司有錢賺又無咩債，靚靚仔仔咁，仲要市值細得嚟乾度都可以，只要配合大市氣氛，相信望返上兩個幾都唔會係難事。
最後預告一下，筆者下期將會分享一個有趣嘅另類賺錢方法（同股票無關），呢個方法最緊要有本，不過大家炒開股票拿十萬八萬出來都應該唔會有困難；當然本細亦可以嘗試，都係一個計Probability（機會率）嘅方法，最緊要係方便到暈，瞓醒收錢唔使用腦。
【權益披露：本人持有三盛控股、守益控股股份】
