梁觀流：北水又唔BUY　奪命狂沽騰訊建行

作者：梁觀流

北水又唔BUY　奪命狂沽騰訊建行

連續兩周淨流入之後，北水上周又走過。根據5月14日至18日嘅數據，全周走資13.1億元。當中滬水買番港股一周後，又反面無情繼續沽，竟然走咗35.4億元；深圳係隔離鄰舍，仲有啲人情味，一周撐足四日，全周仲買咗22.3億元，算係幫得手。不過，踏入本周，北水又番嚟喇！周一單日淨流入6.7億元，比上周五多咗1.9億元，全日都靠深水，單日已買入5.9億元；滬水則係咁意，買咗8,200萬元。

十大成交量嘅個股排名榜大執位，排頭兩名嘅個股都係畀人沽得好狠，買得最勁都只係排到第三。先講捱沽榜，北水走資最大元兇係兩大權重股狂，俾人沽得最多嘅是騰訊（00700），一周淨流出18.9億元；第二大畀離棄嘅個股係建設銀行（00939），走咗10.1億元。單係呢兩隻股已經畀北水抽咗近30億元，一隻股有10億級別嘅成交額，已經好耐無見過。北水好友嘅力量再大，都好難填補呢個大窿。

中資金融股都係北水淡友嘅成主戰場。中國平安（02318）流失咗3.4億元；招商銀行（03968）出血3億元；農業銀行（01288）都走咗2.2億元；仲有工商銀行（01398）都流失2億元。數吓手指同埋腳趾，5隻中資金融股上星期加加埋埋蒸發咗超過20億元，傷勢嚴重。

另外，億億聲畀淡友質嘅個股，仲有瑞聲科技（02018）流出6.6億元；兗州煤業股份（01171）走1.3億元；金斯瑞生物科技（01548）都畀人賣咗1.2億元。

轉攻二線 滬水狂買阿里健康

雖然淡友威晒，都要講吓啲好友去咗邊！上周北水買得最勁嘅個股係中石油（00857），前周畀吉利汽車（00175）搶咗一哥嘅位置，上周中石油生猛番晒，淨流入5.51億元。就算吉利一周掃貨加咗1倍去到 4.46億元，都畀中石油迫番落去，只係做到老二。

另一隻石油股──中石化（00386）都亦步亦趨，上周都畀好友掃咗3.21億元。不過，買得咁猛都係排到第四咋！因為黑馬阿里健康（00241）單周畀北水狂買3.24億元，贏咗中石化一個馬鼻。

油價升唔停，本周二（5月22日）都掂到80美金一桶，石油股升得勁，一啲都唔出奇。反而，阿里巴巴兩隻親生仔──阿里健康同埋阿里影業（01060）無表現咗好耐，當然業績一直都唔靚仔，股價好難有表現。但係上周北水忽然眷顧，阿里健康股價單周升咗31%，成交亦急升到23億，主力買家係滬水，買得咁狠，自然值得尊重。