冼樂欣：北水日日沽　上周走資44億

作者：冼樂欣，大學畢業初出茅廬，主攻財經新聞，曾於本港傳媒任財經記者，後於iMoney智富雜誌工作，撰寫投資專欄，現為Yahoo財經直播節目的主持。尊重由金錢構成的市場成交，樂於在真實市場數據中，尋找投資方向，一邊發掘潛力股，一邊避開地雷股。

北水日日沽　上周走資44億

上周為五窮月最後一周，港股表現反覆，曾跌穿30,000大關，北水繼續唔畀面狂沽。根據5月28日至6月1日嘅數據，北水全周走足五日錢，大出血44.3億元，是連續第三周北水淨流出。

北水三周以嚟每周都以10億元計咁流走，多得滬水唔少，上周滬水獨力賣走42.4億元港股；雖然深水間唔中有錢流入，但加加埋埋上周都係走咗1.92億元。

先講北水10大淨流出股份。一如既往，騰訊（00700）仍然脫不掉北水流出最多嘅皇冠，一周計算淨流出17.42億元，當中滬水走13.7億元；深水失3.72億元。但對比對上一周，騰訊的走錢金額已收窄至5.22億元。

北水淡友繼續主攻中資金融股，情況每況愈下。十大北水淨流出個股入面，有6隻都係呢個板塊。建行（00939）繼騰訊之後最獲淡友鍾愛，而且十分專一，滬水深水齊齊出貨，賣走13.14億元，當中滬水大手沽10.97億元。

其他同類股如工行（01398）捱沽6.92億元；中國太保（02601）走3.4億元；農業銀行（01288）流出1.77億元；中國平安（02318）亦走1.61億元；中國銀行（03988）出血1.51億元。北水淡友疊晒馬，出力中資金融股，六隻股打入十大流出榜，加埋合共走咗28.61億元，連埋騰訊失血17.42億元，一句講晒，淡友最惡！

仲有石藥（01093）都不敵淡友功勢，染藍同靚仔業績帶嚟嘅光環，消耗得七七八八。對上周，明明仲躋身流入榜十大，本周已調轉頭，淪落到成為十大流出個股，上周淨流出4.02億元；港交所（00388）遭滬水唾棄，走資2.16億元；金蝶國際（00268）亦由十大流入個股變成流出，失血1.19億元。

上周北水擺明車馬，唔妥中資金融股，但十大最寵愛呢？真係好難捉摸啊！十大淨流入分散喺唔同板塊，上周中國人壽（02628）飛上滬水枝頭變鳳凰，流入5.22億元，成為北水最愛。第二最愛呢？係融創中國（01918），全周流入3.08億元。眼利啲會發現，國壽淨流入的金額，連淨流出第三位的金額也不如，就知道北水淡友一面倒話事。

煤炭及電力板塊繼續吸引北水眼球，不少上次榜上有名的個股繼續保持優勢。煤炭龍頭神華（01088），全周淨流入1.78億元，吸水季軍是華能國際（00902），淨掃貨1.68億元；水泥股龍頭海螺水泥（00914）的母公司海螺創業（00586），力保不失續留在十大，淨買入1.2億元。

消費股難得打入十大，蒙牛（02319）淨流入1.03億元；華潤啤酒（00291）獲北水買入8,800萬元，相信係因為本月舉行世界盃，睇波效應下，飲品股受惠，其中身為贊助商嘅蒙牛更獲沖喜。另外，濠賭股澳博控股（00880）罕有地獲得北水鍾情，上周淨流入1.61億元。