作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
朋友推介威高國際 但質地不太理想
不出所料，愛股華誼騰訊娛樂（00419）股價繼續造好，上周五曾一度高見0.6元。筆者上個月初4月9日時已經在Facebook專頁「財技戲法」推介華誼騰訊娛樂將會一路向北，當時公司股價只在0.39元徘徊，有成個月大把時間任買，今次算係贏咗漂亮嘅半場仗，點解話半場仗呢？因為大位0.63元未破，只要大破呢個「三頂位」就肯定海闊天空直望1.5元，最近三次筆者都係大爆升前推介，算係捉正佢條路，因為其他財演都係升咗先推介，只係勉強執筆者口水尾。眼見有啲前輩專欄最近寫佢保留健康業務，話健康產業隨時係生金蛋項目，講得呢樣嘢唔怕得罪講句，好明顯係唔熟呢隻股票，因為本身健康業務、資產正正係賣殼後必須陸續剝離，如果有做功課睇公告就知佢不斷加大影視投資佔比，同時不斷清走前健康本業。
有一日筆者同女朋友傾開佢工作上嘅嘢，佢話做大Brand Sales都無做莎莎Sales咁好搵，不過做莎莎Sales超級辛苦，莎莎國際（00178）一直有佢地客底同埋受國內同胞自由行支持眷顧，所以咁多年都屹立不倒，派息穩定，但以現價5.53元計已經有168億元市值，無乜值博率可言，但筆者幾時都覺得女人錢係最好賺，一個女人究竟要買幾多種化妝品呢？相信大部分唔係常接觸美容、化妝品嘅正常男人只係最多答到你唔超過十種；其實要講真係有好多！女人要買面膜（又分保濕、美白、去斑諸如此類）、唇膏、唇彩、粉底、粉底液、眼影、眼線筆、眉筆、眉粉、遮瑕膏、BB 霜、面霜（分日用夜用）、眼霜（又分日用夜用）、眼睫毛增長液、眼睫毛夾、化妝棉、落妝水、粉卜、化妝掃（又分唔同Size）、香水、潔面乳、防曬、去黑頭貼，仲有好多唔同種類嘅濕皮文（Supplement），呢啲簡直係佢地嘅必需品，因為大部分女人出街都一定要化妝，唔化妝基本上係唔洗旨意出街，所以你話賣化妝品點會唔賺錢啊！
由於莎莎國際市值太大無咩吸引力，本周有個老細級朋友推介另一間同板塊公司：威高國際（01173），集團主要業務為製造及銷售女士時裝以及銷售化妝品，有90間Colourmix專門店，其中85間設立於香港，4間位於澳門，1間位於中國；另外更有7間MORIMOR專門店。MORIMOR化妝品專門店整合全球優質護膚美容概念，為顧客帶來高品質潮流護膚及美妝產品，而且產品多元化，範圍涵蓋護膚、香水、彩妝、美髮、身體護理及藥妝保健食品等。威高國際公司依家現價5.85億元市值屬於細細隻容易炒起，而且大股東持貨有六成以上會加分數。不過要留意係雖然公司資產淨值有6億幾元，但大部分都係來自存貨，所以會大打折扣；雖然現市值都係比殼價有一定折讓，公司最近發盈喜預期錄得溢利介乎約150萬元至約650萬元，將會扭虧為盈，但主要原因係化妝品分類業務財務表現改善同埋物業估值收益所致，並唔係完全扭轉劣勢，如果真係要買我會比較喜歡（00653）卓悅控股，下期再講。
Facebook 專頁：財技戲法
【權益披露：本人持有華誼騰訊娛樂股份】
